方丈尋根記

indy

劉以達/ 方丈尋根記 第一回

劉以達@UShop
https://ushop.umwebzine.com/tat-ming

劉以達 Tats Lau


方丈尋根記 第一回

    話說某日聽聞一群有為青年大把諗頭，想活化炮台山一個靜過墳場的商場。
    見到呢個商場的照片，忽然，我有幾秒鐘流馬尿的感覺。
    這個被描述為生化危機場景、好似有喪屍出沒的商場，勾起我一股尋根的衝動。
    呢條古巨根，無疑是一段難以切割的歷史，如果沒有當年這條根，就不會發芽茁壯成長到今日的我。
    閒話休提，大家坐穩，時光機回到1980年代初的香港，我是一個住在彩虹邨的青年，表面上返下學做下兼職，骨子裏卻流動著搖滾的熱血。
  受到英倫高手例如Pink Floyd、Robert Fripp的影響，我儲錢買下人生第一支電結他，於是日日攬住呢支Ibanez苦操8小時，操到手指由甩皮到甩繭，操到鄰居嬲到面青，但又奈我唔何。
  想知我當年點自學結他，下回分解。
P.S.: 本文歡迎轉發分享，但最終版權屬劉以達，大家知方丈好小器。同埋多謝達明archive提供的照片

indy

方丈尋根記

方丈尋根記 第二回

    其實方丈好唔鍾意「天才」呢兩個字，因為人往往會滯留於欣賞表面的「才華」，反而忽略咗背後需要付出的刻苦、努力同堅持。
    當年在彩虹邨，我儲錢買下人生第一支Ibanez電結他，上咗兩堂樂理，已經無錢交學費，就閉關潛心自學。
    我屋企有一部人類偉大發明﹕卡式收音錄音機，雖然舊舊地，但足夠讓我一邊聽電台節目，一邊用卡式帶錄下自己喜歡的音樂，例如Pink Floyd、Yes、King Crimson⋯⋯當時影響我最大的節目主持之一，是左永然 (Sam Jor，《音樂一週》創辦人)，佢推介的歐美搖滾音樂，比較冷門、獨特同偏鋒，無論技巧同概念，都令人大開眼界﹕喂！原來結他仲可以咁玩法。
  於是，我好似發現新大陸，孭起支Ibanez，然後播住用卡帶錄低的David Gilmour、Robert Fripp、Jeff Beck⋯⋯重播一段就自己彈一段，每一粒音都係靠死記爛背，由朝到晚操七、八個鐘，彈到甩皮流血都收唔到手。
    奇怪係我背書無咁勤力，記音符就好鬼享受，不知道是否宿命使然，自小我就喜歡繪畫之類的創作，小學畫畫經常貼堂，其他學術科目就油麻地。
    小學時代，當然未接觸過結他或其他樂器，但好奇怪，在童年時經常發一個有關結他的夢，而且每次夢境都相同。呢個夢，直到現在我都記得，但好少同人講。想知？下回分解。
P.S. 方丈醒兩句你嘆下﹕世上無難事，只要有堅持！

indy

方丈尋根記 第三回

    有時候，有些事情，似乎上天早有安排。
    方丈在童年時，經常發同樣的夢﹕
    一個很高的舞台上，四周是眩目的燈光，我低頭，抱住一個很重很大的結他，彈到好陶醉，忽然下面傳來一陣又一陣掌聲，我抬頭發現，原來台下有好多觀眾。
    我沒有怯場，在掌聲和應下，反而越彈越起勁，直到掌聲淹沒了結他聲。
    每次，在相同的夢境中，我從掌聲中醒過來，睜開眼，問下自己，咦？點解咁靜？人呢？明明掌聲雷動，眨下眼就似雲像煙般散去。
    或許真係命中註定我同音樂有緣，但夢境係夢境，現實歸現實，所謂天助自助者，要掌握高手的演奏技巧，除咗苦練之外就係苦練。好多後生仔問方丈，練結他如何先叫「滿師」，咁你首先問下自己，手指甩過幾多次皮。
    甩一次皮，你開始見到座山。甩兩三次皮，你開始步入山頂間餐廳。甩到無皮，凸起個繭一年半載，方丈就係時候叫你食飽好快D下山。
    經歷過天天操、年年操、日月無光嘅修行，我好快連繭都甩埋，然後發覺，鄰居開始隨風而去，從此無再同我打招呼。
    不過我都相當有道德底線，一到入夜就收聲，晨早再彈到鬼哭神號，鄰里關係雖然崩裂，佢地亦好難作官式投訴。
    大家可能以為，小時發結他夢，長大些少又苦練彈奏，咁將來一定藉音樂謀生啦！
    非也非也，命運永遠是對手！人生好難有直通快車，我最先賺錢，並非靠拿起結他，而是拿起畫筆。
    想知點賺錢？下回分解。
P.S. 方丈Channel （真定假）：又到方丈私人醒時間，好多人問，除咗要吹的樂器，其他都難不到方丈？係咪真㗎？其實好多樂器方丈都唔識，色士風、喇叭、簧、笛呢D，方丈肺活量唔夠，吹唔到，其他例如豎琴、古箏、琵琶等等，方丈真心唔識，學海無涯，好多關於音樂技巧，方丈仲要進修！

indy

方丈尋根記 第四回

初中時，方丈都有些少玩得埋嘅同學仔，不過，隨著各路搖滾英雄佔據咗我的大腦，同學仔就漸行漸遠，甚至覺得我好似一個講火星話嘅科學怪人。
中三之後，基本上我已經成為獨行俠，同儕之中，大部分都盤算將來如何去搵一份鐵飯碗好工，而我呢個飄來飄去的天外來客，就決定做⋯⋯一個有型的Rock友！
咁要成為Rock友，首先我要作出以下改變：
一，留長頭髮，顯示搖滾永不妥協嘅精神。第二，唔稀罕企鵝呀鱷魚呀果D衫，要着有Eric Clapton、Pink Floyd等等圖案嘅，顯示「與我的英雄同在」。第三，拋棄大框眼鏡，改戴contact（幾時見過搖滾結他手出場戴個大近視眼鏡？）。第四，添置樂器，同買部靚音響。
你有無發現，原來要滿足以上進化為Rock友嘅條件，需要一樣幾重要嘅嘢⋯⋯錢。
我一向有打下暑期工咁，香港電台員工餐廳我都做過，但係呢D散工杯水車薪，賺唔到好多。
當時，旅遊業興旺，好多遊客鍾意買幅香港風景畫做紀念品。有需求自然有供給，呢D俗稱「行貨」嘅風景畫工場招兵買馬，於是我就成為一個「行貨畫」學徒，希望半工讀快D賺到錢。
做學徒頭三個月，係無薪水，師傅問想畫水彩定油畫，我選擇比較輕便的水彩，因為油畫顏料要用松節油調色，大味又難乾，而且要佔用比較大空間，而我自己有水彩畫功底，好快就掌握到暈染、層次深淺着色等技巧，三個月後就順利滿師。
「行貨畫」薪酬係逐張計算，當然廠方認為張畫合格先會俾錢，實際做法呢，與其話「繪畫」，不如說係「抄畫」，我對住一幅樣板，貼十張畫紙在牆上，先用水化開個淡色背景，然後重複同一工序十次，背景完成之後，逐層色加上去，由一到十，流水作業，就好似工廠啤機一樣。
「行貨畫」嘅收入都算唔錯，我逐漸由外表開始，一步一步成為心目中的有型Rock友：我真係買咗有Eric Clapton圖案嘅衫，戴咗隱形眼鏡，得閒去髮型屋恤下把長髮，仲買咗一個鼓機同一個結他effector（變音器）。
但係，虛有其表係Rock友嘅大忌，所謂行家一出手，便知香定臭，我當務之急，係要加強結他即興Solo，兼且要向編曲作曲之路邁進。
之不過我呢個獨行俠，點樣可以D.I.Y.在家中編一首有豐富band sound嘅歌？
有計嘅，用「行貨畫」賺的錢，我投資咗一部幾勁嘅雙卡式錄音機，利用呢個雙卡式機加上鼓機同結他、effector，方丈就開始做實驗嘞。
點實驗？下回話你知。P.S.：（又到）方丈Channel（真定假）時間，好多朋友問，聽講方丈你手二胡係向街頭表演者學番來，係真唔係呀？答案係真嘅，方丈落咗廟街，觀摩粵劇檔果位二胡樂師，因為二胡得兩條線，我就

indy

方丈尋根記 第五回

十六、七歲嘅青少年，正踏入「尋找自我形象」階段，據方丈非官方不完全觀察，鍾意踢波的同齡人士十個有九個想做球星胡國雄，剩下果一個少年就操肌想做打星李小龍。
方丈到呢個年齡層，基本上係一個獨來獨往嘅Rock仔，當同學們奔跑在足球場呢個英雄地，方丈就在六條結他線上探索「搖滾」呢個世外孤島。
對一個半成熟的結他手來說，Eric Clapton、Robert Fripp、Jeff Beck等等大師，都係一座又一座高山。
或者你曾經聽過呢兩句對白：
「我每次望住呢座高山，我都想知道，跨越高山之後會係咩風景。」
「當我登上山峰，恍然大悟，原來高山背後，只係另一座高山。」
用以上兩句話來形容我操結他的心境，或者講中一部分。我無咁滄桑，亦體會不到太深嘅哲理，如果彈到一段幾似Robert Fripp嘅solo，我會有莫名嘅滿足感，不過同時我又反問自己：就算彈到九成功力嘅Robert Fripp，咁又如何？我最多係第二個Robert Fripp，就好似十個踢波的少年，追求做胡國雄第二，李小龍第二。
咁點解我要做第二個Robert Fripp，而唔係做第一個劉以達？
一邊諗一邊掃住結他，老實說我無答案，因為我過去一年半載都係跟尾學人，或者，我可以決定做一次自己，而唔係做偶像嘅影子！
於是有一日，我花光畫行貨畫賺來嘅積蓄，抬咗一個大箱番彩虹邨，屋企人以為我去果欄做散工，「咁好仔攞咁多橙返來呀」，可惜佢地失望咗少少，開箱大典揭曉，係一部都算幾頂級嘅雙卡式錄音機。
當時如果要買專業四軌錄音機可能要萬萬聲，我絕對負擔不起，只能用雙卡帶呢種「土炮式」錄音來開始製作一首歌，一首屬於我自己嘅歌。
第一步我要做一個有鼓同bass嘅底：雙卡式前面input結他，後面「蓮花插」input鼓機，用結他低音線扮bass，就完成第一層。
第二步就一邊播第一層，一邊加上幾個結他chord同melody，成為第二層。
到呢步就分ABCD四段，一首歌就大致成形，就好似一個清水單位，要逐步裝修同添置傢具，我再用變音器加fuzz同delay效果，或者加埋mute線技巧，製造回音、長音同清音，成為第三、四層。
「土炮式」製作，經過反覆錄播，到第五層已經蒙蒙地，音質當然麻麻，但好處係用兩餅卡帶就可以做好多實驗，通常一個星期左右我先完成一首歌，因為投資咗雙卡式機無曬錢，課餘時間我仲要繼續畫行貨畫搵銀。
開頭係抱著試下嘅心態，但日積月累，呢批實驗竟然帶俾我終生受用嘅技能，結果方丈點樣打出木人巷呢，下回分解嘞！
P.S.方丈心聲：試第一次未必馬上成功，但如果第一步都唔開始行，某程度上幾失敗。
圖片說明：好多朋友未見過方丈長髮飄飄，其實當年就因為留長髮而被迫轉校。另外一張相中，我所穿的Tee係自己印嘅，上面全部係我喜歡的樂隊名字。

indy

方丈尋根記 第六回

大家都知道方丈麾下有十八銅人，個個都身懷絕技，其實呢，方丈率領隊crew點止十八人咁少，淨係把守木人巷都有一百零八個高手，方丈㩒下計數機，即係要捱得住六次嘅十八銅人陣攻擊，先可以打出木人巷下山。
當方丈仲係一個血氣方剛小沙彌，日日都想推開呢條木人巷嘅神秘大門。終於有一日，小沙彌瞓醒，見到張字條，叫我帶定紙筆去木人巷考模擬試。
我慢慢推開道門，在黯淡燭光下，見到一支結他，一部鼓機，一架雙卡式錄音機同兩盒錄音帶。
忽然一陣大風，眼前光芒萬丈，連串鐘聲響起⋯⋯「劉以達，夠鐘交卷嘞！」
原來光芒萬丈嘅係課室天花幾支光管，數學阿sir又派模擬試卷，而我又係望天打卦，神遊物外，心裏面淨係掛住做音樂實驗。
或者方丈自小已經係我行我素，朋友仔玩超合金，我就剪鐵片自己砌機械人；其他人買波鞋，我就買樂器；同學仔催谷數理化，我就覺得英文對前途最有用，數學經常零蛋，家陣連乘數表都唔係好記得。
放學番屋企，我戴上headphone，沉浸於自己的音樂世界，自從落重本投資咗雙卡式錄音機，除咗食飯去廁所我都係戴住耳筒做人，父母亦見怪不怪，總之我有學校收留就OK。
雙卡帶土炮式作曲，並不是我想像咁簡單，首先係「無得暫停」，每次係一take過，中間稍有差池就要重頭再彈再錄；其次係「無得改動」，錄完幾層之後，如果發覺邊段銜接得唔順暢、邊度要加強減弱，只有寫低然後再彈，錄到滿意為止。
如此練習，就好似同機器夾band，不過機器係唔會等你、唔會遷就你、唔會即時執生、唔使休息，所以我每次彈奏都要好精準，而且要由頭到尾背熟每個chord同走位，日積月累，由背一首歌至十首八首都無甩拖，對我日後在舞台表演有莫大幫助。
其次，在作曲編曲方面我又有更多體會，學懂如何狠下心取捨，顧全大局，去蕪存菁；又或者嘗試不同嘅編法出現不同效果，例如先做一段節奏好勁嘅電鼓groove，然後順勢加上melody；亦可以先有動聽嘅melody，再諗下點營做前奏同副歌。
經歷土炮作曲一年半載，就好似小和尚日日同十八銅人過招，越對拆就領會越多招數，有一個晚上，方丈照例又買咗新出版嘅「音樂一周」，見到一個徵人夾band廣告。
過去年幾兩年，見住卡式機多過見人的方丈，落到街見到人人個樣都好似部一模一樣嘅卡式機，呢個廣告真係當頭棒喝，「係咪時候打出木人巷，下山會一會各路英雄呢？」
想知方丈點加入人生第一隊樂隊，下回有古講！P.S.：方丈心聲～你可能失敗過九十九次，但只要一次成功，呢個經驗就終生受用！
圖片說明：方丈當年孭住Ibanez結他在總統琴行（好多band友在旺角租band房），同隊友Patrick 準備jam，我地中學都未畢業。

indy

Prologue
我唔出聲，唔等於無嘢講。
人生世局，變幻無定，我同好多草根階層一樣，用民間智慧去拼搏，努力跨過每一道難關。
此刻處於一個前路未卜嘅時候，我更加要分享我嘅故事，亦都係獅子山下其中一個在困境中迎難而上嘅故事。
如果我追尋理想嘅歷程，能在愈來愈狹窄嘅平台上為人帶來一點歡樂、一點鼓舞、甚或一點啟迪，何樂而不為？

方丈尋根記 第七回
上一回，可以話係方丈音樂旅程嘅一個中轉站。
在抵達中轉站之前，少年方丈好似獨力踩緊一架單車；到咗中轉站，我就坐上一隻舢舨，身邊多咗兩個人，我地要合力撐過對岸。
好多朋友都已經估到，方丈即將講到生平第一隊樂隊：DLLM。呢隊連埋我有三個人、從未出過碟兼且只公開表演過一次嘅神秘樂隊，坊間有不少疑問同誤傳。有人好奇點解改呢個名，有人好想聽佢地嘅創作，有人想知為何解散⋯⋯唔好心急，方丈會一一道來。
首先方丈要澄清，好多網上資訊話Patrick Lui（雷有輝）曾經加入DLLM，絕對係誤傳，我嘅DLLM隊友係Patrick Chan，可能有人混淆咗兩位Patrick，於是愈傳愈錯。其實DLLM組成嘅時候，雷有輝已經有一隊叫Trinity嘅樂隊（之後組成太極）。
咁點解一向做獨行俠嘅方丈會走去夾band？是否當時有一股樂隊熱潮？事實上自我出生嘅60年代，樂隊潮流從未在香港消失，我地只不過追隨咗泰迪羅賓、Joe Junior、阿Sam等前輩腳步，用音樂表達自己。在我開始夾band前後，都有去睇本地樂隊演出，例如前輩Ram Band／Chyna。
「未夾過band？你點做Rock友？」，無錯，夾band都係磨練嘅一環，因為有幾個人一齊創作，每個人都要學習執生，學習互動，在協調與較量之間，希望交織出另類嘅火花。
睇到《音樂一週》徵求樂隊成員廣告，我就膽粗粗孭住結他，依時去到尖沙嘴嘅Mark 1錄音室。現場有兩班人，一邊玩緊超級勁爆嘅重金屬，另一邊就比較斯文。我有少少緊張，正在猶豫之際，有個髮型都幾punk嘅哥哥仔就叫我過去⋯⋯「哦，係斯文果邊！」我心都定一定。
Punk頭哥哥仔叫Eric，年紀大我小小，另外有個高瘦嘅學生哥Patrick，好似同我一樣中學就快畢業。大家簡單交流下平時鍾意聽咩歌，摸索下彼此口味，就插上結他開始我嘅「面試」。「玩12個bar blues，repeat，兩個chord一個cycle。」呢個指令係我第一道試題，即係彈奏嘅長度同幾時要轉換和弦，對音樂唔熟嘅朋友可能唔知噏乜，咁譬如我去茶餐廳打工，都至少要識「孖春食丁」、「扣底走色」之類術語，玩音樂亦有音樂嘅術語，否則就毫無章法唔知點夾。
試咗一輪，我發覺佢地玩嘅風格幾有Joy Division（英國神級Post Punk樂隊）味道，於是我就調整一下節奏回應，音樂都可以係一種對話，在你一言我一語之間，大家覺得OK，啱嘴形，有得傾，有化學反應，就有得夾落去。
我離開Mark 1錄音室，手心多咗兩個電話，Eric同Patrick，就係呢一刻開始融入我嘅生活。P.S.：夾band要租band房，當年嘅總統、Mark 1都係常去場地，band仔通常AA制攤分租房費用，一個月夾十幾次嘅租金都係一筆唔小嘅數，我夾band時仍然畫行貨畫賺錢來支付所有使費。
方丈珍藏圖片：我嘅DLLM隊友Eric Tam（左邊）同Patrick Chan（右邊）。圖文©劉以達

indy

方丈尋根記  第八回

遙遙望向對岸  海旁萬點燈光

應徵完畢，我同Eric 、Patrick兩位型男交換咗電話，又同隔離班Punk band青年爹咗一輪（後來都成為我音樂路上嘅friends），喺友好氣氛下離開Mark 1錄音室。
華燈初上，我漫步行去尖沙咀碼頭吹吹海風，冷靜一下。
對岸有座高樓，窗口全部係圓形，當時叫做康樂大廈。
海岸線嘅另一邊，又有一幢圓柱形嘅高樓正在埋尾，呢幢合和中心有66層高，落成之後就會取代52層嘅康樂大廈，成為亞洲第一摩天大樓。
對我呢個60後嘅土生土長香港仔，康樂同合和，都帶著不同嘅時代意義。
經歷毀滅性股災同石油危機，香港人咬緊牙根，一步一步走出經濟衰退陰影，70年代康樂大廈巍然聳立，正正代表咗香港人靈活變通嘅打不死精神，幾許風雨，我地仲企喺度。
在1980年歌舞昇平下完工嘅合和中心，對我來講，就代表咗傳承與蛻變，香港不但重返亞洲四小龍前列，亦已經從啤膠手工業城市轉型為世界金融中心。無數好似我咁嘅60後，滿懷理想，希望發揮我地才能，打造一個國際都會、香江盛世。

從來未聽說  世間一切美好

同Eric 、Patrick見多咗，我對佢地認識又加深少少，高高瘦瘦成個防彈少年咁款嘅Patrick，家境好，讀名校，斯斯文文。大我地幾年嘅Eric，喺加拿大讀完藝術返香港，任職廣告公司，佢比較成熟，健談風趣又滿腦子新主意，好自然就成為band leader。
對佢地嘅印象，只係覺得好奇妙，一個富家子，一個番書仔，竟然同樣有一顆搖滾嘅心。
喺合作初期，我地已經有非常明確嘅音樂路向，第一係獨立創新，唔會跟人尾翻玩Pop songs; 第二係堅持原創純音樂，以公開表演為目標。
咁公開演出，隊band就要有band名，當時夾band流行改英文名，一係好美麗好文藝、一係好Pop好美式，諗諗下，上述兩者都唔係我地杯茶。
讀藝術嘅Eric，就提到19世紀顛覆歐洲嘅潮流Dadaism，即係達達主義。呢場運動可謂推翻一切傳統歐洲美學觀念，方丈唔係學院派，理論唔多講，關於達達主義，就簡單用兩個字形容：玩嘢。
咁我地又覺得幾過癮，因為當時無乜人會循「玩嘢」、「顛覆」、「惡搞」嘅方向改band名。如果其他人鍾意文藝，個名要有意義，我地不如就粗俗，玩「無意義」，咁有咩粗俗詞句幾乎係人都識？你知我知，咪就係香港人問候別人娘親嘅四字詞！
一講四字詞就好興奮，不過，回心一想，太直白唔好，應該留番一點想像空間，於是四字詞英文諧音～嘅第一個字母，DLLM，就成為我地首選名字。
DLLM，可以好多解釋，Patrick可以話Don't Like Loud Music，我話係「大腩撈麵」，佢又話「等你來吻」，聰明的各位一定諗到更多有創意嘅嘢，歡迎話我知。

然而人在世界  誰能沒去路

因為要遷就Eric 、Patrick返工返學時間，我地絕大多數夜晚夾band，租band房錢就AA制平分，好彩旅遊業興旺，我畫行貨風景嘅收入都唔錯，但學業就乏善足陳，仲因為留長頭髮要轉過兩次校，不過好彩都符碌讀到中學畢業。
在畢業之前，DLLM都夾咗成年，我地玩嘅係Art Rock/Post Punk，如果硬要講參考對象，我會話係英國神級Post Punk樂隊Joy Division，例如我地用鼓機加Eric嘅真鼓，營造有旋律嘅敲擊，又或者我同Patrick用雙結他加上預先program嘅電音，都係有Post Punk風格，但係強調一點：我地係純音樂，無主音無人唱歌。
我地會同時進行創作幾首歌，每星期聚兩次，演奏番上次作到一半嘅曲，有化學反應就即興逐層加上去，遇到樽頸位停滯不前，就跳過呢首玩第二首，搞搞下，都有五六首完整嘅作品在手，足夠應付一個concert。
當其時搞個音樂會，所有嘢都要親力親為，我地自掏腰包，分頭去訂場地、印海報、自己上街貼埋、賣飛、租車運輸器材、試音，真係由頭到尾都咁好味。
比起一年前獨自用雙卡式機作曲，DLLM令我有生以來第一次有「同伴」嘅感覺。到現在，我都覺得好奇妙，上天安排咗兩個咁啱key嘅人出現，但係各人嘅生長背景又有咁大差異。
DLLM第一次公演，地點係‪灣仔藝術中心‬嘅演奏廳，記得應該係坐百零人嘅細場，演出當晚全場滿座。
不過，咪以為就咁掂咗，好戲在後頭，DLLM好似坐過山車，由地下升上天堂，又從天堂燉番落地獄。
無論甜酸苦辣，路，係人行出嚟。下回見。
P.S.：好多朋友問方丈，DLLM夾band有無講粗口，有無嗌交？我印象中有時彈衰咗會講單字詞，大部分時間都好斯文，嗌交一定無，最多係話我結他太嘈，叫我收細個fuzz。呢樣可能同我自小獨自玩作曲有關，經常都音量過大，直至達明一派時期，明哥都會提我細聲小小。圖文©劉以達

indy

方丈尋根記  第九回

中學畢業之後，我開始面臨就業嘅壓力。
無學返，唔通日日坐喺屋企等開飯？
我呢D60後，父母好多都係上面落到香港，佢地死慳死抵捱一世，都係想子女接受良好教育，攞張大學沙紙、做到醫生或者乜師物師，就叫出人頭地，再唔係做個公務員，都叫做「鐵飯碗」。
之不過，當時香港得兩間大學，大專院校五隻手指數曬，入到大學嘅比率只有不足百分之二，咁另外果百分之九十八、好似我咁嘅人又點算？
好彩，70年代尾香港已經成功轉型，金融服務成為經濟重心，地下鐵路通車之後，沿線商圈嘅發展亦帶來無限商機，加上個人通訊又便利咗，個個陀住部call機搵食，地鐵車廂唔係你BB聲就佢震震下，商貿興旺，連帶廣告業、出版業都需要大量嘅生力軍投入市場。
於是，我就憑多年畫畫嘅功底，入咗一間設計學校接受專業培訓，亦對父母算有個交代。

嘗孤單一身  去闖去問

社會轉型，青年方丈都要轉型。我由一個著校服孭書包嘅四眼仔，轉型為聽住Walkman搭地鐵嘅美術設計學生。
雖然讀設計都幾忙，每星期有兩晚，DLLM仲係一路keep住夾band。
好多人以為，夾band彈結他咁有型一定冧死女，事實恰恰相反，當時大部分人都認為夾band係不務正業，女仔會覺得無安全感，拍拖梗係搵個大學生或者乜師物師，點會浪費青春喺一個前途未卜嘅band仔身上？
初初夾band，的確俾我有一點搵到「同伴」嘅感覺，但在地下實驗音樂咁「小眾」嘅茫茫路上，身邊缺乏支持、感到孤單似係必然，所以有時候我都幾羨慕隊友Patrick，佢家姐好support佢夾band玩音樂，耐唔中仲會加入客串下彈琴，為我地帶來一些額外能量，可以話係DLLM半個成員。
經過不滿一年嘅創作，我地覺得係時候公開表演，就分頭去搵場地。高山、壽臣都太大，最後我地決定喺灣仔藝術中心recital hall搞，自費租咗場，印完海報就夾手夾腳周街貼。
1982年，終於、終於，等到DLLM正式售票公演，亦都係我正式「出道」嘅大日子。
當晚，除咗DLLM基本三劍客，Patrick家姐Annie都同台幫手彈keyboard，另外，同一場地（不同演出時間）仲有一隊叫Commune Rivals嘅樂隊⋯⋯大家記唔記得，我去Mark 1錄音室應徵結他手之時，隔離房有隊超級勁爆punk band？無錯，佢地就係全港第一隊punk band：Commune Rivals，好有緣份，第一場公演我地又撞埋一齊！
後來，Commune Rivals嘅鼓手，曾經同我一齊表演過，呢樣容後再說，先回到藝術中心recital hall果晚，我原先以為，賣到七成飛算幾好，點知出乎意料，唔知係咪DLLM效應，竟然全場爆滿。
大家又記唔記得，我兒時曾經發過好多次嘅結他夢？我企喺一個好高嘅台上演奏，台下傳來雷動嘅歡呼同掌聲⋯⋯我當晚公演，現實情況同個夢境完全唔同，首先個場地係無台嘅，而且在全場坐滿人之下，頭幾行觀眾同我地距離非常近，幾乎平行視線，你眼望我眼，搞到我十分緊張，根本連個夢都記唔起。
「佢地會唔會憤怒地DLLM我，叫我回水？」同觀眾距離咁近，我開始胡思亂想，果陣時電影午夜場觀眾會媽媽聲向銀幕掉煙頭，我心諗，佢地從來無聽過我地嘅音樂，大部分人都係因好奇而來，萬一觀眾慶合合除鞋掉我咁點算。
經過一兩首熱身，見隊友好似平時練習咁各就各位，完全無甩拖，我就漸漸投入到演奏中，五六首歌之後， 我擔心嘅情況例如器材失靈、入錯key轉錯chord之類蝦錄嘢都無發生，到最後，我地仲嚟咗一段現場即興演奏，即係俾觀眾一個結尾「彩蛋」，叫做圓滿演出，觀眾亦回報咗一陣禮貌的掌聲，比起兒時夢境中嘅歡呼，呢一陣掌聲完全唔算熱烈，我無諗太多，返回後台，鬆一口氣，至少喺票房上，DLLM嘅處子演出都唔駛蝕本，仲有微賺。
有些意想不到嘅係，《獅子山下》劇集導演方育平竟然現身，同我地傾咗一陣，又話有機會想搵我地合作做電影配樂，當時，真係覺得非常鼓舞，至少起碼有個知音人賞識。
收拾好樂器，我地去咗宵夜，回想起來，DLLM每次練習完都各有各歸家，從來無約埋一齊食餐飯，呢次宵夜，可算係樂隊首次飯局兼慶功宴。食下傾下，我地又憧憬住下一次去更大嘅場地表演，甚至錄音出唱片專輯。
過咗一排，大家又創作咗一批新曲，心思思想再接再厲，搞番場show。今次，我地睇中堅道明愛中心個場地。咁搞唔搞得成？下次話你知。
P.S.：方丈記得，DLLM在總統琴行曾經有一個錄音session，共錄製咗9首純音樂，包括side A 五首，side B四首（其中有幾首在Youtube上有得聽）。在80年代，Walkman真係偉大發明，如果話地鐵縮短咗通勤嘅時間，Walkman就縮短咗人同音樂嘅距離，我地無論坐車以至跑步，都可以隨時隨地聽到自己喜歡嘅音樂，聽歌嘅人一下子多咗，音樂市場就更加大。

indy

方丈尋根記  第十回

1982年，係方丈出道之年。我人生第一隊band： DLLM，在灣仔藝術中心處子演出。
1982年，亦係充滿更替變動嘅一年。麥理浩卸任，尤德上馬；麗的呼聲賣盤，易名亞洲電視；《最佳拍檔》破票房紀錄，梅艷芳贏「新秀」冠軍。
喺一連串1982年嘅畫面快轉而過之際，最令人唏噓嘅一幕，恐怕係戴卓爾夫人步出北京人民大會堂嘅世紀一仆。
呢一仆，亦都預示咗方丈在音樂路上嘅最痛一仆。
在揭露呢幕傷心史之前，要同大家分享一部最近睇嘅戲：《淺田家》。
方丈除咗繪畫，仲鍾意玩下攝影，呢部《淺田家》，就係講日本攝影家淺田政志嘅故事。
喺未成名之前，淺田政志搵咗三十幾間出版社，都無人願意幫佢出攝影集。終於，有間蚊型出版社肯做，但攝影集推出之後，銷情慘淡，仲要靠淺田媽媽私下買咗二十本，先無咁肉酸。
充滿挫折感嘅淺田政志，鬱咗足足兩年。
但係蚊型出版社老闆娘同佢講：「我幫你出書，係因為我喜愛你嘅作品，我真心覺得你影得好，一件好作品，永遠都會係好作品，而且全世界只有你，先可以影得出呢種作品！」
乜嘢叫好作品？我覺得除咗創意、質感，仲有作品蘊含嘅能量、發放嘅感染力同埋反映時代嘅寓意。
兩年後，蝸居喺女朋友屋企、捱緊即食麵嘅政志，贏咗最高榮譽木村伊兵衛賞，等於年度最佳攝影家。

太多懺悔羞怯  太快毀滅

果兩年我唔知淺田政志點捱，但我絕對體會到佢嘅失落同痛苦。
1982年DLLM首度演出當晚，坐百零人嘅recital hall出乎意料地全場爆滿。
我地一小時嘅演奏好順利，仲即興玩咗加長版本，完場後導演方育平話有興趣合作做配樂⋯⋯初試啼聲，呢個結局算圓滿，心情就好似旗開得勝，贏咗一場戰爭。
於是我即刻想食住條水，諗緊下一場show。
當時，好多樂隊都租堅道明愛禮堂做show推廣，我滿懷希望，可以有上次一倍嘅觀眾，呢個禮堂就啱曬河車。
其實，第一場叫做滿座，但盈利非常微薄，都係夠車錢飯錢而已，唔知點解，我有勇氣再揼曬積蓄出去，自資再接再厲搞場大嘅。
我地分頭訂場地、喺音樂雜誌登個廣告、貼埋海報，以為唔使點宣傳，淨係專心作D好嘅音樂就足夠打動人心。
的確為咗第二次表演，DLLM特別排咗幾首精彩嘅新曲，為咗上台，我仲特登去買件好型嘅外套，成個David Sylvian咁款，話曬演出完梗有D唱片監製呀文化界呀要social下，唔可以失禮。
1982年嘅初冬，我地托住器材撐上去堅道明愛準備開show，唱片高層文化人連條毛都唔見，飛就賣得十幾張。
喺西北風之下，我地等咗半粒鐘就好似萬年咁長，風繼續吹，但觀眾就遠離，DLLM三個你眼望我眼，心入面DLLM緊，唔知發生咩事。
都係成熟嘅隊長Eric夠冷靜，「再咁落去，連場租都蝕埋。」計下計下，壯士斷臂，唯有撻訂退場。
最令我失去一切尊嚴嘅係，要親自出去同買咗飛嘅人卑躬屈膝，即刻退票回水，我地三個一鋪清曬袋，連車錢都嘔埋出嚟填數。
望住一個空空如也嘅大禮堂，我連暗暗講一句「我一定會番嚟」嘅信心都無，落寞地行落中環。
「點解？係我地作品唔夠好？定係呢個地方無人識欣賞？」幾個月前打勝仗嘅猛虎，而家變成一隻鬥敗公雞。
喺中環名店嘅玻璃窗倒影，見到自己件David Sylvian外套，我想除咗佢揼落街邊個垃圾桶。
過咗幾日，隊長召開會議。我以為賽後檢討，商量重整旗鼓。晴天霹靂，佢地兩個話：散band！
又唔怪得兩位隊友，因為加拿大有學校收Patrick，佢一定要去升學；而Eric本來就係加拿大籍，佢要同彼岸嘅家人團聚。
呢個冬季，我好似上咗擂台對住暴風般嘅泰臣，砰嘭兩拳就瞓低收工嘔白泡。
番到彩虹邨，我喺床下底攞番部雙卡式錄音機出嚟。忽然間，我攪住部錄音機，就好似佢係一個默默中守候緊我嘅摯友，「對唔住、對唔住！」同樣一句說話，我喺明愛退票時講得好唔甘心，但呢一刻我好慚愧悔疚，估唔到我最忠誠嘅朋友，係呢部永遠都等我番嚟嘅冰冷機器。
P.S.：《淺田家》部戲，仲講到政志自暴自棄，想逃避攝影學院嘅畢業考試，但老師同佢講：「你可能迷失咗，唔知想做乜，咁你認真諗下，如果一生人你只可以影一張相片，你會影乜？」我好有同感，因為我1982年嘅冬天曾經迷失咗。
相信果一年嘅冬天，好多香港人都會迷失，打贏福克蘭戰爭嘅戴卓爾夫人在北京跌一跤，就仿如一個預兆，十二月香港股市樓市重挫。
回望去，奮鬥已學會。圖文©劉以達

indy

方丈尋根記  第十一回

落魄的這段人生  交織滿孤單腳印

1983年初，中英談判陷入僵局。
香港掀起一波移民潮，我兩位band友離隊遠赴加拿大，DLLM成為歷史，青年方丈又做番獨行俠。
音樂會胎死腹中嘅挫折、隊友離開嘅失落，並不會在一下子煙消雲散。
除咗心情低落，荷包都係一個最現實嘅問題，為咗搞公演，我已經清袋，彈盡糧絕。
在茫茫大海中，唔想沒頂，就先要搵到一根浮木。
於是我執齊在設計學校做過嘅插畫，上去一間報館應徵製作嘅職位。
面試嘅人唔少，目測年紀最細係我，可能見我捱得，主管阿叔好快就叫我番工。
成為報館員工第一日，我被派到分色排版部門，呢份工作，係方丈人生第一份全職，亦係我在漆黑大海中嘅浮木。
我相信捱到黎明曙光初現，會見到遠方嘅燈塔。

回復我熱誠  前路看清

過去兩年夾band可以話進一步開拓咗我嘅視野，體驗到編曲上更多可能性，在作曲上更加得心應手。
雖然「反傳統」嘅DLLM散咗band，但係我心中「反傳統」精神並無消失，要做，就做人地未做過嘅嘢。
香港本來就係華洋混雜、中西合璧嘅社會，好似蛋撻、西多、鴛鴦呢D民間小吃，都係揉合不同文化，進化為啱港人口味嘅香港特色飲食。
咁搖滾音樂又可唔可以有香港特色呢？
自從70年代中期，全世界掀起「功夫熱」，西方流行音樂開始加入一D東方元素，例如好多人都識唱嘅"Kung Fu Fighting"，就用咗好多模仿中式樂器嘅鍵琴聲。
不過，呢類歐西流行曲加幾粒東方音符，就好似雙層牛肉漢堡飽中間夾多塊叉燒，並唔係真正嘅融合。
我又用雙卡式錄音機嚟做實驗，試下用電結他彈出中樂嘅曲調，再用Art Rock嘅形式去編排。
喺做實驗嘅時候，遠方嘅燈塔出現咗。
我每期必讀嘅《結他》雜誌，登廣告話舉辦全港第一屆結他比賽。
迷失好一陣子嘅青年方丈，又好似重新搵到目標。
比賽分兩個部分，第一係現場即興演奏，唔需要作定一首歌；第二部分就係一首完整作品，由頭玩到尾。
據我所知，初賽有成70隊band參加，從中挑選10名晉身決賽。
距離初賽只有約一個月，由於隊友已經離去，唯有搵人幫手，正好，我應徵結他手時認識咗punk band "Commune Rivals"，就邀請佢地鼓手Ronnie幫我打鼓，加上電子琴program，連bass都無，勉強湊出我近期實驗嘅兩首歌。
到正式初賽，我都有D失笑，感嘆天意弄人，原來場地係DLLM唯一一次演出嘅藝術中心Recital Hall。
禮堂內，除咗各路高手，仲有地下音樂嘅傳奇人物、《結他》雜誌主筆、黑鳥樂隊郭達年做評判。
無論如何我點都估唔到，上天又俾一個機會我，喺呢個充滿感慨嘅場地再度考驗自己。
咁我會俾失敗嘅陰影再一次吞噬？定係我靠自己雙手去克服呢個恐懼？
P.S.：方丈當年有兩本唔食飯都要買嚟

indy

方丈尋根記  第十二回

1983年，香港經歷咗一個「黑色星期六」。
中英談判幾輪都無傳出好消息，一時之間謠言四起，搞到銀行擠提、港幣大跌。
英國政府被迫出手，搞咗個同美元掛勾嘅聯繫匯率，挽救港元。

深宵海邊的低溫 安撫著孩童的心

1983年初春。方丈去到結他比賽場地，即係灣仔藝術中心Recital Hall。面對郭達年、左永然、Teddy Suen呢班重量級評判，可以挽救我嘅人，就係我自己。
前輩郭達年曾經講過，有D人唱歌玩音樂，係因為民眾有呢樣商業娛樂需求；但亦有D人唱歌玩音樂，係因為佢地有情感要傾訴，有說話要溝通，雖然呢種聲音或者卑微，但係無比咁真實！
我入廁所洗個面，摑自己一巴，對住塊鏡質問：點解要嚟呢度？點解要參加？
我等咁耐，唔係為咗娛樂或者討好呢班評判，機會只有一次，我要用自己嘅音樂，講出真正心底嘅說話。
初賽場地無乜佈景燈光，似jam session多過比賽，感覺同我舊年喺呢度演出時差不多。
選拔環節係自由發揮，我一出閘就踩盡油，摩打手較剪腳，一時短傳滲入，一時橫掃千軍，真係Jimi Hendrix上曬身，差在未用棚牙嚟彈solo。
最後一招手指尾拉西，我將呢幾個月所有嘅失落、傷感、挫折、憤慨、迷失與不甘，好似如來神掌萬佛朝宗咁，一次過通乾淨所有在腦海中嘅坑渠。
全場好似核子彈爆發果道白光閃過之後，寸草不生、鴉雀無聲⋯⋯⋯⋯。
我孭住結他，沿住灣仔海皮漫行，夜幕海風之下，感到一股入心入肺嘅舒暢，即使我嘅音樂語言唔係最動聽，至少我義無反顧咁吶喊咗出嚟。
好快我就接到入圍通知，決賽，係一個月之後，壽臣劇場。
老實講，我仲要返報館全職工作兼畫行貨畫，俾半年時間我都未夠，唯有同臨時拉伕嘅鼓手Ronnie簡單夾咗幾次，就豁出去準備終極一戰。
決賽之前，郭達年特別同我地講，唔好在意輸贏，應該珍惜呢次同高手交流嘅機會，喺香港，係好難得有咁多志同道合嘅band友共聚一堂。可能係無乜心理負擔，我完全唔緊張，上齊兩個fuzz同delay「地雷」，就開始玩我創作嘅純音樂《紅衛兵》。
好在Ronnie都係擅長爆肚嘅鼓手，一邊播住鼓機，一邊加咗佢自創嘅節奏，我呢隻《紅衛兵》係快歌，好多層次，本來可以三、四個人演奏，但家陣反而因為只得兩個人，無咗成隊band咁多制約遷就，我玩得好開放，三扒兩撥就好似自由博擊咁由頭進攻到尾。
決賽九支隊伍，就有如華山比武，各大高手都各有看家本領，起初我都想像一下，會唔會有個張無忌，以一人之力殺退六大門派，不過賽後看來，隊隊band各有特點，無邊個必定贏硬。
但係有一隊band特別吸引咗我嘅目光。
因為呢隊band，除咗個靚仔鼓手之外，其餘三個結他手都係戴眼鏡。
初時我以為呢隊學生哥玩下爵士樂，點知個結他一響就有Rock味，技術一流。佢地嘅風格介乎迷幻同金屬之間，憤怒得嚟又帶一絲藍調幽怨，都市得嚟又混雜少少民族色彩。
呢隊band，叫做Beyond。
比賽結束之後，就開始咗我同Beyond一段緣份。
圖片說明：David Sylvian外套終於出現。1984年1月，我與Beyond同在銀礦灣音樂會演出，果陣好凍㗎。
P.S.：80年代有兩個結他大賽，好多人會將兩個比賽混淆，而網上又有好多不實資訊。咁我以自己經歷簡單整理一下：1981年通利琴行主辦「Yamaha山葉結他比賽」，參加者係彈古典或流行結他，但一定無電結他（因要跟隨Yamaha日本總公司章程），所以《結他》雜誌為照顧電結他手，就在1982年1月搞咗個Electric Guitar Festival，我都有參加。《結他》雜誌1983年初再接再厲搞咗個Players Festival，就係我同Beyond參加呢個，同屆仲有太極樂隊嘅蛇仔盛旦華。到1984年，通利嘅「山葉結他比賽」加咗一個「樂隊」嘅項目，Beyond有參加（我無，遲D話你知點解），冠軍係Xian樂隊，蛇仔嘅Zoo獲亞軍。圖文©劉以達

indy

方丈尋根記  第十三回

1983年尾，英國接受「五十年不變」方案。
中英談判破冰，雙方同意在1984年草簽。
大局已定，舞照跳，馬照跑，香港又回復紙醉金迷末世風情。

#兜兜轉轉 化作段段塵緣

1983年Players Festival，在郭達年開咪宣布結果嘅回音下落幕。
大局已定，Beyond得冠軍，我得優異獎。
評審好公開透明，大會將評判嘅計分表發俾每一隊，頭幾隊分數相差只係個位數字。
評判講過，除咗技術、原創性，仲要睇隊員嘅合作，無可爭議，Beyond三方面都表現得非常好。
對於得優異獎，我當然高興，但又不至於衝返屋企大喊「阿媽我得咗啦」。
反而令我更開心嘅係，郭達年過來同我講﹕「對你印象好深刻，記得舊年Electric Guitar Festival我都俾好高分你，希望你繼續努力！我地好快會錄一張香港band嘅唱片，你準備下。」
除咗灌錄唱片，比賽嘅頭幾名都有機會參加《結他》雜誌搞嘅戶外表演，增加演出經驗之餘，又同其他樂隊成員多咗交流。
喺堅持原創、注入新元素去做有香港特色嘅音樂，呢點我同Beyond家駒不謀而合。
83年10月，我同Beyond都有去澳門白鴿巢公園表演，路上同家駒傾談，發覺佢一講到鍾意嘅話題，就滔滔不絕可以講好耐。
正所謂「家和萬事興，家駒口不停」，佢真係健談又轉數超快，好多idea，你唔同意佢就開始講道理，講幾粒鐘，講到你投降為止。
我就啱啱相反，無乜急才之餘動作又好慢，成個老人家咁，於是band仔圈內就開始叫我「達叔」，而好似維園阿伯咁長氣嘅家駒就叫「黃伯」。
仲記得去白鴿巢公園果日天氣炎熱，有如身處赤道，結他都可以煎雞蛋。
Beyond最先出場，家駒一邊嗌好熱，一邊大汗疊細汗同觀眾介紹首歌，口若懸河咁解釋，滴到成氹汗水都未講完，真係服咗佢。
如果講band leader，家駒可以話係天生嘅領袖，佢比較成熟，夠自信又有諗頭，堅持主見之餘又識照顧人，相比之下，我就完全唔適合做一個band leader。
我享受夾band，但無領導同統籌才能，亦不擅溝通，咁係好難搵幾個人合作去將我自己嘅音樂完整呈現出嚟。
呢個時候，我發現到一個新大陸：synthesizer同MIDI，可以撳個製就變出成隊band sound嘅效果。
83年已經好紅嘅英倫新浪漫樂隊Depeche Mode，就係全部用synth演奏，而德國嘅Kraftwerk，就更加係synth嘅老祖宗。
不過，真正驅動咗我去研究synth嘅，係日本YMO。
一個黃臉孔電子樂團，可以打入歐洲排行榜，可以去紐約演出，真係俾我好大鼓舞。
於是，我透過band友借來一部synth，日刨夜刨，將個menu參透，然後就用五音階作曲。唔太熟音樂嘅朋友可能未聽過五音階，簡單嚟講，就係西樂嘅Do, Re, Mi, Sol, La，京劇同中樂，就係用呢五個音。
其實喺DLLM時期，我已經常用五音階，有咗synth之後，彈五音階就更加方便，例如synth上面嘅黑鍵，就近似中樂，掃得快仲可以有古箏效果。
雖然方丈練咗好耐結他，但彈鍵琴就只係二級水平，而且只識用右手，咁我要搵一個真正識彈琴嘅人幫助，咁點有緣份結識呢個朋友？下次再慢慢講。
P.S.：中樂用嘅五音階，亦出現在東南亞、非洲以至蘇格蘭民謠。兜兜轉轉 化作段段塵緣，五音階就係3322  553322，係咪好過癮呢？
圖片說明：澳門白鴿巢公園表演，果陣烈日當空，要借副黑超戴先頂得住。圖文©劉以達

indy

方丈尋根記  第十四回

1983年夏，導演方育平開拍電影《半邊人》。
可惜，DLLM已經解散，結果出現喺部戲裏面嘅樂隊，就係Beyond。
有人話世事如棋，不過，有時俾部超級電腦你都計唔到。

#絲絲點點計算

我開始盤算，用synthesizer整番隊one man band，自己program好所有樂器聲，咁咪唔需要靠人囉。
當時一部機萬萬聲，我報館月薪一千八百大元，點買呢？
於是我就諗咗一個「你出錢，我出力」嘅屎橋，周圍發散消息，問有無人有部機但係搞唔掂個說明書。「你借部機我研究，我學識就教你用，好快！」
聽落好似幾傻，但緣份嘅嘢就係咁，所有激情都難免一時盲目，所有浪漫都源自一絲戇居，又真係俾我班到⋯⋯唔只一部，係兩部正嘢：一部Yamaha同一部Roland。
孔明借箭都無咁快手，我即刻化身末日博士，捧住兩本說明書日刨夜刨，搞到番工成日遲到，排版房阿叔黑曬面。
對住兩部synth左撳右撳，cable上穿下插，整整下當我嘅研究略有小成之際，有隊英國電子樂隊Modern Romance準備嚟香港演出。搞手話，想搵隊香港嘅電子樂隊打頭陣，幫佢地暖下個場，煲熱氣氛。一聽到有呢個機會，我就四出打聽，原來呢隊Modern Romance有個成員，喺英國代理synthesizer，仲話要將最先進嘅synthesizer引入香港市場，咁我當然想開下眼界。
「琴我而家有兩部，要組隊電子樂隊，起碼要四部琴同一兩部sequencer喎！」我同個搞手講。
「總之你搵人，我出琴。」搞手拍心口話：「唔通話俾隊英國band聽，香港連隊電子樂隊都無咩，靈堂瀨尿失禮死人呀。」
結果，我真係有齊想要嘅琴同sequencer，然後又有人介紹咗個有興趣玩電子音樂嘅熟手琴師。
呢位琴師面長長有D似真田廣之，佢叫Simon。我就話，synth嘅program、駁MIDI，都唔係問題，最大問題在於，我係楊過，淨識單手彈。
咁現場彈嘢就由Simon主理，我就搞作曲同program。夾咗幾次，我同Simon你眼望我眼，好似口淡淡，總係欠缺咗一D嘢。
「唔好講住，好肚餓，落街篤兩串辣魚蛋先。」
我一路行一路諗，忽然諗起英倫樂隊New Order，側邊有個彈琴嘅女仔Gillian。「係佢啦！我地兩個麻甩佬，就係差個Gillian。」無錯，魚蛋無辣汁就唔算真正街邊魚蛋，如果兩個麻甩佬係兩粒魚蛋，Gillian就係辣汁同支竹簽。
篤篤下魚蛋，隔離有檔雞蛋仔，香噴噴，有個面圓圓嘅學生妹等緊。
「喂！呢個做Gillian得唔得。」
「咁問下又唔駛死。」
我地在請食雞蛋仔攻勢下，先問人肯唔肯做模特兒影樂隊海報，繼而問佢識唔識彈琴，識少少呀？不如上嚟夾下band，「嘩小妹妹你彈得幾好喎！不如上埋台一齊玩。」你一言我一語，符符碌碌組成個「嬲」字團。樂隊名我一早諗咗，就係「東方電子樂團」，簡稱OEO。日本有YMO，香港有OEO，到時講個名俾Modern Romance知，都嚇得下人。
就喺等待OEO正式演出前，有件大事發生：香港體育館（紅館）開幕，第一位喺紅館開演唱會嘅，係阿Sam許冠傑，而第一位嚟紅館嘅外國歌星，就係David Bowie。
真係望穿秋水，終於等到偶像。
有一日收工，我特登坐巴士經過紅館，眼前呢個有如太空基地嘅建築物，似近實遠。對我嚟講，如果高山劇場係地球，紅館舞台就係外太空另一個銀河系星球，只可以用天文望遠鏡欣賞下，無超級嘅裝備，係發夢都上唔到。
P.S.：我同家駒都係Bowie迷，仲記得果晚，係12月8日，John Lennon死忌，Bowie喺紅館唱出Imagine作為悼念。我見唔到家駒，因為我坐喺好遠嘅山頂位，但係可以想像，佢一定睇得好興奮好投入。今時今日，但願Bowie同家駒喺天堂玩得開心，佢地已經留低咗無與倫比嘅音樂俾地球所有人。
圖片說明：當年嘅OEO，幾有新浪潮文青feel。圖文©劉以達

indy

方丈尋根記  第十五回

方丈人生頭兩次組樂隊，都係以失敗嘅公演告終。
第一次係DLLM「未曾酒醉已清醒，未曾出場已退飛」慘案。堅道明愛果次，賣得十幾張飛，仲要即刻回水。
第二次係東方電子樂團，我地參加一個band show，原定有十幾分鐘演出時間。
一首歌後，換來陣陣噓聲，第二首歌，聽到漫罵同問候，第三首未開始，無數嘅紙團、紙碎，好似導彈咁射上台。
現場峰煙四起，無人可以保護我地，唯有在一片「收皮」聲下，執拾器材，折戟離場。
兩宗不愉快事件令我反思，自己係咪適合組樂隊？如果唔係，我嘅音樂前路又應該點走？
如果話Kraftwerk嘅電子音樂在我腦海播種萌芽，YMO就在我心中開花結果，讓我愛上咗電子音樂嘅獨特聲音。
究竟我可否以電子音樂同電腦編曲，完全取代一隊band？
就在反覆思量之際，有兩個電話嚟，一個係郭達年，佢通知我即將要灌錄一隻叫《香港》嘅專輯。另一個，係《龍的傳人》候德健，原來佢老哥北望神州，在佛山工作。
當時內地改革開放，有不少個體戶「先富起來」，特別係鄰近香港嘅廣州一帶。
佛山就有一個老細，開咗一間高檔錄音室，佢購入大批先進硬件，唯獨欠缺人才。於是，比較多接觸歐西音樂嘅香港樂手，就成為僱傭兵，上去幫手做下「free欄士」。
候德健接咗好多廣告歌同電影配樂，一個人做唔曬，就召我去佛山幫佢彈結他，彈彈下同個老細熟咗，又叫我作一隻歌。
「唔通係鄧麗君定徐小鳳？」我心諗。
老細開估，竟然係⋯⋯⋯⋯兒歌！
「唔好睇小兒歌呀，好賣得㗎！」老細一路數銀紙一路陰陰笑。
勢估唔到，立志做Rock友嘅我，第一首有錢收嘅原創歌曲，係一首兒歌。候德健聽見，拍下我個頭，用半咸淡廣東話笑笑口講：「兒歌好難作㗎，俾心機啦細佬。」
最後，我呢隻《勤學活力歌》，爬咗《繼續追尋》頭，成為我嘅正式處女作。唱歌嘅曾敏詩，亦爬咗黃耀明頭，成為第一個唱我作品嘅歌手。
講真，兒歌嘅最大得益，並唔係錢，而係認識咗呢隻專輯嘅監製：黃耀光。
佢就係幾年後同陳德彰組成Raidas嘅電子音樂達人黃耀光，錄兒歌之時，佢已經操作緊非常罕見嘅Roland 結他synthesizer，價錢又係萬萬聲，我有幸可以借嚟玩，因為我結他功力比鍵琴強，呢個彈結他就可以變好多聲嘅器材，的確帶出無限嘅可能性，可以話係加強咗我鑽研電子音樂嘅決心。
由於要準備《香港》專輯錄音，加上間中要去佛山做「free欄士」，我有好一陣子無同東方電子樂團玩。
不過再忙，我都要去紅館捧Bowie場。果晚，坐喺山頂位，其實我睇得不算投入，望落紅館成萬座位，我不禁思考：要用乜嘢去衡量自己嘅音樂好壞？係賣幾多張飛？有幾大分貝掌聲同喝采聲？定係我隻歌賣唔賣得？賺幾多錢？
P.S.：紅館Bowie之夜，除咗家駒同家強，仲有一個人在場。呢個超級Bowie迷，同老細講果晚一定要放假去睇concert，點知老細話唔敢包噃，呢位哥哥仔就索性連份工都辭埋，安心去捧場。佢就係：黃耀明。
圖片說明：我同東方電子樂團成員Simon準備在理工表演。圖文©劉以達
*如果要重溫頭六回《方丈尋根記》，可以follow 方丈IG：https://www.instagram.com/tatslauyeetat/

#化作段段塵緣

indy

方丈尋根記  第十六回

古代鄉下窮書生上京考試，十年寒窗，個個都想高中狀元，一舉成名天下知。
青年方丈孭住個結他，喺熙來攘往嘅彌敦道行色匆匆，就好似寧采臣孭住個竹背囊咁，低頭直奔金巴利道Studio A錄音室。
當日，我要去灌錄《香港》專輯。
＃激情 ＃在瞬間溜走
呢隻大碟有五組人十首歌，包括1983年度Players Festival冠軍Beyond同另外四個優異組，每組可以錄兩首歌。
我仲緊張過考科舉，一個星期前已經密密操練。因為《紅衛兵》同《中國女孩》，都有四五層結他及bass，我就逐層練習，希望以最佳狀態錄好人生第一隻專輯。
上到Studio A，果然名不虛傳，高樓底同隔音牆氣勢恢弘，呢個錄音室不但留低好多巨星嘅口水尾，仲係頂級樂師世界高手出入之地，少D料都唔敢入去彈奏。
「係呀，竹田和夫上個星期先嚟錄咗個session之嘛。」錄音室個助理輕描淡寫咁講，我就急曬尿，心諗：「大佬，竹田和夫喺日本武道館開concert，同Santana巡迴tour㗎！」
《香港》專輯係郭達年自資，錄音嘅嘢佢話曬事，入到房，郭達年就話：「難得有機會可以有咁專業嘅師傅同器材，你好好把握嘞！」
唔講由自可，前輩一講，搞到我呢個初哥有如第一次射十二碼決勝負，眼前個龍門框縮到火柴盒咁細，隻腳好似灌咗鉛咁舉步維艱，心都跳埋出嚟。
最大鑊係，錄兩隻歌係有限時，夠鐘就吹雞完場，無得補時附加賽。當日我係獨行俠，唔似其他band咁有幾個人set up，聽見限時，就手忙腳亂搞掂個鼓機先，結他聲我都未校好就趕住開波。
錄演奏一般有兩種方式，一種係direct in，結他直接駁去錄音機，係好清晰嘅原音；另一種就係結他用擴音器出聲，然後用兩支咪，一遠一近收錄擴音器嘅聲響，呢種係錄變音效果，最重要係擴音器要調校到最好嘅音色。
我無時間慢慢調擴音器，於是用direct in直入錄音，盤算住以彈奏技巧嚟做殺手鐧。「嗱一陣間就出絕招，用腳掣嚟拖長結他尾音，造出中國管絃嘅效果。」
但係我忘記咗，原來direct in，係要坐喺監製同錄音師傅旁邊，而唔係自己坐喺個獨立band房咁爽。偏偏，監製同師傅都係我好驚嘅郭達年同David Ling。
郭達年嘅輩份唔駛講，成個太極宗師張三豐咁，David Ling係82年結他大賽冠軍，技巧無懈可擊，我畀佢地夾住，變咗隻鵪鶉，望見身邊成百粒掣、閃下閃下嘅超大panel，真係腳都軟埋，仲有乜彈奏招數可言。開波之後，蝦碌咗幾次，腳掣又唔聽話，鼓機又太大聲，但時間就一分一秒在瞬間溜走。
Studio A器材可以話位列世界尖端，混音出嚟嘅聲，唔止高音甜、中音準、低音勁，仲要原音清、回音拫，一句即係通透之中嘅通透。
咁我又諗，鼓機太大聲，或者結他聲唔靚，可以用尖端後期製作器材補救，呢個後期混音，先係最重要一步。
錄完兩隻歌，我行番出彌敦道，緊繃嘅神經好似盧海鵬愛膚堅廣告咁，舒服曬，但係個心就十五十六，唔知後期混音救唔救到頭先嘅失誤。
P.S.：講到錄音，Studio A雖然好貴，但佢地亦經常贊助香港樂隊，例如本地皇牌搖滾樂隊CHYNA(亞洲鼓王Donald、蘇德華、黃良昇，Pal哥）專輯就喺Studio A錄，佢地個個都係身經百戰精英，三扒兩撥就錄好，其中一首加咗古箏慢歌《Within You'll Remain》畀小鳳姐改唱成粵語版嘅《一臉紅霞》。另外不得不提嘅係1996年嘉利大廈慘痛火災，90後嘅朋友仔可能唔記得，現在嘅佐敦薈商場，前身係嘉利大廈，寶麗金錄音室就喺嘉利十樓，96年發生沖天大火，錄音室好多母帶損毀，例如許冠傑同關正傑，仲有達明一派，我個人最可惜係《麻木》專輯母帶亦浸濕曬，大部分歌我都難以再複製。圖文©劉以達

indy

方丈尋根記  第十七回

上京考試，無疑我交咗一張不甚滿意的答卷。原因在於太過於想做好，又畀自己無謂嘅壓力。
我在基層出身，生活本來就唔會順風順水，但回望一下，雖然難關處處，還不是關關難過關關過嗎？如果畀自己太多壓力，只會變得更負面，甚至未打仗已經輸咗！
所以，我地身在逆境並不可怕，可怕在於未戰先慌，記住，我地曾經克服過幾多困難，經過幾多風雨，仍然企喺度。

＃這世間 ＃原是愛
錄完《香港》專輯，我就一心等最後混音環節，希望可以救番D太弱嘅結他聲。
混音之前，首先要去影專輯嘅封面照片。
為咗配合兩首有中國樂器味道嘅音樂，我著住件幾有東方民族色彩嘅衫，又班咗支靚結他，上去指定影樓，仲有專人化下妝。對我地呢D第一次出唱片嘅新人，待遇都算不錯。
攝影師打好燈光，叫我坐定定。
「唔好笑。」攝影師唔滿意我嘅過度興奮表情。
「笑都唔得？」我心諗，於是將個百分之百哈哈笑表情，收縮到百分之十嘅含羞淺笑。
「唔好笑，個樣要cool。」攝影師又唔滿意。
好好好，唔笑唔笑，點知越係提醒自己唔笑，反而越想笑。
「嗱，你攪住個結他，想像你係羅密歐，個結他係中毒垂死嘅茱麗葉，生離死別，恩怨情仇，百感交集。」原來攝影師仲可以做埋導演，好快教我入曬戲，封面張咁有mood嘅「劉密歐」相片就咁完成。

我地幾組人係分開影相，後來我聽講，有隊band唔齊人，臨時搵咗兩個人妖，都幾出位！另外Beyond本來約咗四個人影相，點知當日鄧煒謙同李源潮，一個遲到一個無到，為咗維持陣容，家駒就拉咗家強入鏡，點知影完相，家強就真係取代咗阿潮做bass手。

《香港》專輯嘅封底，有每組人嘅文字介紹，我就略為解釋下兩首純音樂嘅創作背景。
《中國女孩》女主角是一個經歷文化大革命之後來到香港定居的中學生。《紅衛兵》則是用電結他彈奏出中式管樂的實驗成果。
錄音時用的樂器，包括Ibanez "Musician"結他、Fender P低音結他、Roland TR 808鼓機。變音器用Roland Fuzz Box、Boss Delay、 Phase Tone。
個鼓機當時調校得太大聲，其實應該用鼓機加真人打鼓兩種聲音混合，可惜時間同財力都不容許。

除咗灌錄唱片同影相，我地仲要參加戶外表演，例如搭船去銀礦灣參加Day in the Sun音樂節，又係一次難忘嘅經驗。
經驗有好，亦有不好。我同家駒交流咗好多關於創作香港特色音樂嘅意見，對於我地日後寫歌大有啟發。
而唔好嘅經驗，熟悉英倫音樂嘅朋友可能知，Joy Division有一次演出，引起觀眾衝上台群毆事件。有時Rock concert嘅觀眾太好火，只要有條導火線就好易爆發不愉快場面，銀礦灣果次，就有人血灑沙灘。
詳細情況，下回分解。
P.S.：當年傻戇嘅方丈，一直等通知去做最後混音，但一路都無人提起，方丈又鵪鶉，唔敢出聲問，結果到咗《香港》專輯面世，先知我無參與混音，鼓機聲大過結他聲嘅效果，到底點解無修改，至今都係一個謎。
圖片說明：大家喜歡《香港》專輯封面嘅「劉密歐」嗎？

indy

方丈尋根記 第十八回

1984年一月，政府突然加收牌費，全港的士罷駛抗議，不但癱瘓交通，晚間更引發騷亂事件。
電視上見到旺角硝煙處處，油麻地差館前面群情洶湧！

＃別叫嚷  ＃讓青春比猛火囂張

或者因為騷亂過去不久，街頭多咗警察查身份證，我同鼓手Ronnie抱住一件二件樂器，喺碼頭差D被誤會係爆竊疑犯，尤其是Ronnie，攝兩支鼓棍喺牛仔褲袋，仲似攻擊性武器。
「阿Sir，我地去銀礦灣鄰里滅罪音樂節表演㗎。」好彩我記得有人提過「乜乜滅罪」呢個名，節目又係市政局有份協辦，好快獲得放行上船。
離開喧鬧市區，在船上彷彿聞到鄉郊獨有嘅田園味。
一落船，就見到郭達年同結他雜誌嘅人，好似農夫咁捲起褲腳推住木頭車，車上全部都係音響器具。
「乜政府無派人嚟幫手？」
「幫個屁，我地連油漆工都自己做埋！」結他雜誌阿平悻悻然佈置緊舞台。
我見到舞台寫上「Day in the Sun」，「唔係市政局講乜乜滅罪節咩？」
「Bull shit！」郭達年一臉不屑，好似打死都唔肯改個名。
咁又錯有錯着，如果我同個警察講「Day in the Sun」，可能被人塌咗番差館。
户外表演唔係想像咁簡單，山長水遠由碼頭推D器材去沙灘，現場又唔夠人手佈置，搞到大會延誤咗，有部分觀眾一早來到，等到中午時份，開始鼓躁。
普通市民抱住旅行心態，喺沙灘飲飲食食，似乎唔多介意，但一群明顯係Rock友嘅觀眾，情緒比較激動，尤其是一班佔據住舞台台階嘅年青洋人，有幾個已經飲到啤啤夫，賴死喺台階唔走。
不知是否受到的士罷駛後騷亂影響，人人都特別心火盛，大會趕班洋人離開台階，司儀又開咪叫觀眾安靜，未開show已經嘈交，洋人同工作人員嘈，司儀同觀眾嘈，跟住觀眾又同洋人嘈。咁嘅情況，第一隊表演嘅樂隊一定會畀人噓到七彩，搵邊個上呢？「唔駛抽生死籌啦，我地上啦！」關鍵時刻，都係家駒最有義氣，一聲號令，就帶Beyond上台試咪。
一如所料，觀眾大喝倒彩，洋人粗口滿天飛，仲叫家駒講英文。
家駒就好少理，由得佢地嗌，間中又特登講歪D音，同班洋人鬥玩。
第二隊，係我同Ronnie出場，洋人見我唔出聲淨係彈奏，就開始奚落我嘅髮型，又笑我著咗阿爺件衫，叫我番鄉下彈琵琶。呢個時候，部分Rock友似乎不值班洋人咁囂張，反唇相稽，局面又變成華洋對罵，雙方劍拔弩張，揸住汽水樽啤酒樽紥曬馬。
參加音樂節嘅，仲有一隊洋人樂隊，佢地又嫌太遲出場，同工作人員起爭執；台下班年青洋人應該係嚟撐場，明顯對華人樂隊懷有敵意，「搖擺樂係我地嘅文化，你地黃臉孔行開，咪阻頭阻勢！」我覺得佢地係發出呢種訊息。
跟住其他華人樂隊表演之際，洋人變本加厲，揸住支酒衝上台行嚟行去，想挑釁我地。台下班華人觀眾愈來愈慶，有幾個人開始推撞。
我同家駒本來約咗一齊玩最後一首歌，見情況不妙，就先行撤退。我地未行到碼頭，就有人爆樽，上演六國大封相，跟住警察操去沙灘，後來聽講拉咗個醉貓鬼仔。

雖然呢次同Beyond合作不成，但回程我又同家駒交流咗中西音樂融合嘅意見，由侯德健嘅Folk Rock加插中國嗩吶，講到David Sylvian同坂本龍一嘅《Forbidden Colours》（禁色），我地都認為，東西流行樂想互相靠攏，係大勢所趨，但要做到融合，就非香港人莫屬，因為香港人本身，就喺華洋共處嘅社會成長，最懂得採長補短，創造香港特色產物。與君一席話，勝讀十年書，之後我地各自嘅作品《大地》、《長城》、《石頭記》、《情探》等等，都可以話係成功嘅實驗。
不過，在沙灘華洋衝突後，我地又大談中西融合，喺維港中英文廣告華燈嘅包圍下，實在有點兒諷刺。
P.S.：講到《香港》大碟，Beyond呢個名係阿謙為參加比賽而改，呢個典故好多人知，而我自己嘅英文名Tats，其實來自一張Santana唱片，我中學時見到Santana有個伴奏樂手叫Tats，好似係印度人，覺得幾有趣，就開始用呢個名。圖文©劉以達
圖片說明：銀礦灣試咪，可惜盧海鵬大哥無嚟。

indy

方丈尋根記  第十九回

聖誕新年，都係我鍾意嘅假期。
之所以鍾意，並不是我享受拍拖睇燈飾、撐檯腳食燭光晚餐之類。
80年代，好多人戴有色眼鏡去睇band仔，我呢D玩地下音樂嘅，女仔睇唔上眼，拍下散拖或者會，但講真心就太奢侈。

＃看着夜幕在慢慢轉

過年過節，就一定有舞會；有舞會，就需要樂隊；樂隊唔夠人手，我就有得搵食。
特別係當年好流行遊船河party，架船出到黑漆漆嘅大海，夜幕低垂，樂隊現場演奏好易搞熱氣氛，最緊要開頭有幾首Hotel California呢D大路歌，工作又輕鬆又好賺！
現場band大致上有華人同菲律賓人兩種，賓仔生意好旺，因為佢地天賦有音樂感，技巧好，普遍收費又平。
華人band勝在同聲同氣，技巧唔差又識玩曬D中文流行歌，我地賺外快機會都唔少。
通常遊船河party有兩班船，我多數跟住華人band做第一班，賓仔band就第二班。
黃昏上船，夜晚10點落船，幾個鐘好易過。
公眾假期又唔使返工，又有得夾band搵外快，聖誕新年係咪無得頂？

基本上，我中學畢業後，經濟上已經相當獨立。
報館份工係全職，周末又畫行貨風景畫，加上夾下現場band，耐唔中又幫佛山老細彈廣告歌，收入算OK。
我做果份《星報》，初入職係做剪剪貼貼嘅排版，幾個月之後，報紙增加咗兩版漫畫，請咗《兒童樂園》主筆，我就轉咗去漫畫部門做分色，仲加咗人工。
漫畫本身係黑白，我嘅工作就係蓋上一層半透明嘅牛油紙，標出漫畫中嘅顏色，例如條裙紅色、棵樹綠色等等，製版師傅就根據標示去做藍、紅、黃、黑四個版，印刷時將四隻色重疊，就變成色彩繽紛嘅報紙。
呢份工好處係做完當日嘅漫畫版就收工，手腳快，就可以早走，咁我仲有時間練習結他同研究synth。

因為83年嘅Players Festival搞得幾成功，郭達年再接再厲，計劃84年暑期又搞多次樂隊大賽。
為咗造勢，先前錄好嘅《香港》大碟，亦在暑期同步推出。
另外通利琴行主辦嘅山葉結他比賽，84年又加咗一個樂隊項目，呢個暑假認真熱鬧，我聽講Beyond會分拆成兩隊去參加山葉大賽。
正在滿心期待唱片面世之際，我接到個晴天霹靂嘅電話：報館取消咗漫畫版，成個分色組都摺埋。
份全職工作突然無咗，我都無乜心機參加比賽，所以84年無同家駒、家強、世榮、阿Paul佢地玩山葉。
雖然最後Beyond分拆兩隊都無得獎，但比得獎有更好嘅收穫：因緣際會，當時有個《現代年青人週報》嘅編輯好欣賞佢地，就係為Beyond填咗好多靚詞嘅劉卓輝。

＃難以入眠  ＃沈思千百遍

加入失業大軍，唯一安慰嘅係即刻有三個月人工補水，銀行戶口有成皮嘢，我飄起一個去英國旅遊嘅念頭。
不過十秒之後，我已經將呢個衝動焚化咗。
在我面前，係一個黑洞，一個好似宇宙咁大嘅「不可知」。
「不可知」係一隻雙面怪物，當你熱戀時，伴侶所有嘅不可知都係一種魅力；當你過咗蜜月期，伴侶所有嘅不可知都係彌天大罪。
當你有大把青春，前路即使不可知都覺得好刺激；當你滄桑過，前路仍然不可知就係一種悲哀。
好多人21歲，就有機會遊遍歐美；我，21歲，卻要面臨人生中最重要嘅關卡。
圖文©劉以達
P.S.﹕報館係方丈人生第一份全職工作，亦係迄今為止唯一一份。方丈人生第一次去外國邊度旅遊？係曼谷，80年代港人好興週末去泰國玩幾日。
圖片說明﹕方丈有時上佛山工作，會去郊區行下。                                  **如果要重溫頭十八回《方丈尋根記》，可以follow 方丈IG：https://www.instagram.com/tatslauyeetat/

indy

方丈尋根記  第二十回
失業同失戀，邊樣可怕D？
我就覺得，失業同失戀，本身都唔可怕，可怕嘅係隨之而來果種空虛。
當你突然失咗一個寄託，睇笑片實無趣，食龍肉都無味，即使置身鬧市，都彷似萬籟俱寂。
所以，我第一個對策，係盡量唔好畀自己有空閒時間胡思亂想，自尋煩惱。
第二個對策，就係將「你出錢，我出力」嘅概念發揚光大。既然我借完琴都要教番人，從經濟效益嘅角度出發，反正我都背熟咗個說明書，教一個不如教十個。
有時上天截住你道氣，未必係整蠱你，可能係提點你。
無咗份工，我同班地下音樂band友關係反而好咗，傾下講下，佢地就介紹咗我去一個靜過墳場嘅商場。
呢間位於北角嘅富利來商場，除咗樓下一間士多稍微有人煙，樓上好似二次世界大戰毒氣室遺跡，「直情係喪屍樂園，」band友Ronnie話：「你上去憑弔下就知。」
當我行過成排有如俘虜集中營嘅密室，半壞嘅光管閃下閃下，奇怪，我居然感到一份與世無爭嘅寧靜詳和，覺得好適合喺呢度搞創作。
於是，我就同band友合作，將一個冷巷單位闢作教室，取名「新音樂製作社」；另一群band友又喺隔鄰單位開設band房，叫做Tone & Tone。
1984年，我地呢班地下band友，就成為佔領富利來商場嘅喪屍。
因為日日夜夜都喺Tone & Tone夾band，我索性準備好毛巾牙刷長駐，初時怕樓下個管理員阿伯會干涉，點知佢好人到暈，次次見到我地班喪屍都笑咪咪，打個招呼就消失。
有一朝早，我又通宵研究電子琴，天濛光鼠咗入廁所刷牙，竟然撞正看更阿伯。
「哎吔唔好意思，我住彩虹㗎，太夜無車番去⋯⋯。」
話口未完，阿伯用半咸淡廣東話講：「年輕人，唔駛怕我趕你走，你諗下，趕走你地，個商場連唯一租客都無埋，咁仲要我呢個看更做乜？」
阿伯用佢手中讀到殘嘅《三國演義》拍下我：「呢D就係，唇亡齒寒。」
我又跟阿伯學到嘢，後來先知，原來北角有好多上海江滬文化人聚居，真係卧虎藏龍之地。
＃你已佔據我每天
失業之後，如果話我內心無掙扎就係呃你。
21歲人，係咪應該要搵番份正職呢？
但係，諗到報館分色嘅刻板沈悶，又或者畫行貨風景畫嘅千篇一律，我係咪一世人都做咁機械化嘅工作？
上天畀咗繪畫嘅天份我，同時又附贈埋音樂嘅天賦，我應該朝邊一方面發展？
當時，內地改革開放，香港廣告行業興旺，好多人投身廣告設計，對我而言，做設計或者插畫嘅高手已經好多，好難有出頭機會。
音樂呢？我至少參加過《香港》專輯，既然走出咗一步，點解唔試下第二步？
有咗富利來呢個大本營，我決定日日好似去返工咁，一邊教下學生，一邊研究電子音樂打入主流市場嘅可能性。為咗加強號召力，我仲搵有份錄《香港》專輯嘅電子音樂人Tony，幫手一齊教學，又刊登咗個「新音樂製作社」招生廣告。初時學生唔多，好在教室隔離有Tone & Tone，可以經常夾band打發時間，有時又會同band友去世榮嘅二樓後座，聽佢地吹水。你話三個女人一個墟，其實五個band仔口沫橫飛嘅場面仲勁個賓虛，每次聽佢地東家長西家短八盡天下事，我仲點會寂寞空虛。
P.S.：北角好多上海/浙江文化人，例如林憶蓮嘅爸爸林德華先生，就係香港中樂團成員，專業二胡。過咗好幾年，「達明一派」成立之後，我才有緣同林憶蓮成為樓上樓下鄰居。憶蓮1984年曾經做商台《早晨星期一》DJ，之後辭職去咗唱歌，聽講臨時頂替憶蓮做《早晨星期一》主持嘅，就係明哥黃耀明。
圖文©劉以達
#早晨星期一  #林憶蓮  #黃耀明  ＃富利來商場  #二樓後座