方丈尋根記

indy

方丈尋根記  第二十一回
日劇《深夜食堂》每集開場，都有一段店主獨白：「一天結束，當人人趕回家的時候，我的一天才開始。菜譜只有這幾樣，不過，菜譜沒有的，只要我能做，都可以點。
你問有無客人？客人還真不少。」
＃讓每刻青春 ＃與街燈每晚重逢
每次睇番《深夜食堂》，都覺得開場果段獨白，剛好係我在富利來商場「喪屍學堂」教學嘅寫照。「一天結束，當人人趕回家的時候，我的一天才開始。」⋯⋯「我教嘅只係呢幾樣，不過，只要我識，你都可以問。你估有無學生？答案是：冇乜學生。」

開宗明義，叫「新音樂製作社」，教電子音樂，無人咁傻話要來學古典結他，亦無一個望落係正正經經品學兼優嘅乖孩子。或者真係物以類聚，入到喪屍學堂，個個學生唔係似Boy George就係似Morrissey，好多都擔住口煙，面色蒼白，一睇就知係好少見光嘅夜鬼。
有人來學電子編曲，亦有人學結他技巧。電子方面，主要係教點樣program，如何駁線，連接所有鼓機、合成器等等，熟習器材操作之後，就可以學做一首歌，在旋律之上加入和絃以及適當分段。結他嘅學生，全部都已經有相當基礎，我就傳授一D技巧例如滑線、推線，亦有人指定想學某一首歌，或者想作一首歌送畀人，我都盡量達成佢地心願。當時在結他雜誌，好多讀者寫信埋怨某些師傅唔過料，又或者交好貴學費跟菲律賓師傅，仍然進步不大，我希望呢D事唔會發生喺我身上。

喪屍學堂所賺嘅學費，勉強夠每日食飯盒嘅生活，加上去船河舞會打band搵外快，日子尚且過得去。
學堂有一部四軌錄音機，我有時間，就以東方電子樂團（OEO）名義，前後製作咗十幾盒demo帶，分發畀音樂雜誌社同唱片公司。經過大半年，OEO嘅demo全部石沈大海，完全無回音。
每當喺喪屍學堂行出去幽黯橫街，以往夾band嘅挫折一幕一幕湧現心頭，賠錢退飛、被人扔紙、喝倒采、各種嘅奚落同語言暴力⋯⋯我忽然醒起，已經好耐無番過彩虹邨，好耐無見我嘅最忠實朋友：雙卡式錄音機。
我不禁問自己，係點樣走過來，又何去何從。
如果部雙卡式錄音機問我：「老友，你D音樂有無進步呀？」
我點回答呢？係大言不慚話我仍堅持原創，備受欣賞？定係話反應冷淡、現實中只有寥寥可數嘅知音人？
環境迫使我要認真考慮下，前路要點樣行。我可以繼續教學，夾下band，做下兼職，玩自己喜歡嘅音樂；但如果我要喺音樂範疇出人頭地，就要適應同打入香港呢個口味咁單一嘅市場。
80年代中後期，有兩個社會現象值得注意。
第一係好多70年代出洋留學嘅人番咗香港，佢地大部分係專業人士，可能細個聽Beatles，見過Woodstock大場面。男嘅可能睇GQ雜誌、去意大利餐廳食晏，周末同朋友滑水；女嘅睇Vogue去Joyce買衫，上文華飲杯咖啡，番屋企做Jane Fonda體操。
第二係藝穗會、藝術中心、進念嘅文化青年，佢地會喺藝穗會播Bauhaus同jam歌，去Art Centre討論下Andy Warhol，喺進念打躉睇歐洲電影。
上述呢兩班人，多數買原裝歐美入口唱片，聽英文台，但並不代表佢地完全抗拒中文歌，或者精確一D，廣東流行曲。
因為佢地無論點西化，佢地嘅根始終係香港。
而當時香港嘅流行樂壇，就正正缺失咗一個「西化廣東歌」甚至係「歐洲新浪漫廣東歌」嘅選擇。
咁我要吸引呢兩班消費力強大嘅潛在買家，就要一首可以唱出嚟嘅hit歌，亦即係，我首先需要歌詞同一個歌手。
P.S.：1984年尾，我經常喺「喪屍學堂」過夜，留意到商業二台‪晚上十時‬有個《突破時刻》節目，主持叫潘源良，間中會播下幾hit嘅歐美流行歌。其他主持仲有何式凝、周耀輝等。現在，佢地都成為「達明」嘅老朋友。
圖片說明：「喪屍學堂」地方淺窄，擺放器材之後幾乎無地方坐，難為當年的學生了！
圖文©劉以達
＃富利來商場 ＃東方電子樂團 ＃進念 ＃突破時刻 #潘源良 ＃何式凝 ＃周耀輝

indy

方丈尋根記  第二十二回
前前後後交出十幾盒「東方電子樂團」demo錄音帶，都好似交咗去黑洞，有去無回。
此路不通，加上生活所逼，我一定要試下兜第二條路走：作一首可以唱嘅歌，敲下主流市場大門。
首先，要突圍而出，就必須確立風格同主題，再考慮歌詞同主唱。
當時嘅香港樂壇，比較大路嘅就係得幾味，第一係情歌，第二係跳舞快歌，第三係電視劇主題曲，好多都係武俠劇。第一同第二味，大部分都用日本流行曲填上中文歌詞，好少原創。
每當喺喪屍學堂通宵研究電子音樂，記錄低一D我覺得幾好聽嘅旋律，我會進一步諗下，可以點樣包裝呢個旋律。
有人話，新人出道，派台嘅多數係大路情歌，最穩陣亦最容易被接受。
我就認為，即使做一隻情歌，都應該係不落俗套。「情」呢個字，本身就非常遼闊，絕對唔只係「愛情」。如果情歌單係著墨於邂逅嘅疑惑、相愛嘅甜蜜、失戀嘅痛苦，就好似由地球望向月亮，我地永遠只睇到皎潔嘅月海，而無從得知陰暗嘅坑洞有幾震撼。

＃假使不是一夥 ＃我就等於怪物麼

喪屍學堂隔離，就係Tone & Tone band房。同一班年齡相若又志趣相投嘅人夾band，的確令我暫時忘記好多煩惱。
唔知點解，當我有咗作一首流行曲嘅念頭之後，入到band房個心情都唔同咗。鼓聲響起，我嘅目光逐一停留喺眾多band友身上，打鼓嘅揮汗如雨，彈琴嘅搖頭閉目，無論係乜嘢姿勢、乜嘢表情，佢地都處身於一個忘我嘅享受狀態；冷峻偏鋒嘅音符讓佢地證明自身尊嚴、搖滾節拍將佢地送到某個世外桃源。
如果我投身搞流行曲，band友會點諗呢？「流行」兩個字，同「地下音樂」係勢不兩立嘅態度，band友會唔會覺得我背叛咗佢地？會唔會對我嘅「妥協」冷嘲熱諷、反唇相譏？如果我嘅「妥協」最終都失敗，會唔會落得一個「兩面不是人」嘅下場？
果一晚喺band房，band友流住熱汗，我個心就滴下冷汗。

曾經有一個三十幾歲嘅女性朋友講過一番心聲：「婚姻」就好似人生一道考題，三十歲前結咗婚嘅，點都叫做有個答案；年過三十仲未搵到如意郎君，即使打扮得幾漂亮，外表幾咁唔在意，喺已婚嘅朋友面前，總係覺得自己水深火熱。
或者用以上嘅角度去形容我對前途嘅焦慮，未必完全適合，但我絕對明白果種外表唔care、內心煎熬、不到黃河心不息嘅感受。
人一生，會有好多第一次，band友接唔接受，我都要豁出去；即使係跳入黃河，墮入火坑，我都要咬緊牙關博一博。
我手上一張底牌，就係我寫下嘅旋律。
自小我就好鍾意動漫，小時候咸蛋超人、幪面超人以至鐵甲萬能俠等等英雄人物，不只是我對「邪不能勝正」理念嘅啟蒙，每齣劇集嘅主題曲，更加奠下我創作流行音樂嘅基礎。點解呢類英雄動漫主題曲，聽一兩次就印象深刻甚至琅琅上口？因為佢地嘅編曲、段落流動、起承轉合都有近似嘅方程式，而我從小就入曬腦消化咗，令我好快可以分辨到乜嘢旋律係比較有流行嘅潛質。
有咗動聽嘅旋律仍未足夠，要首歌與別不同，就要襯托出一個獨特嘅氛圍，再喺呢個mood裏面發揮一個到肉嘅主題。
或者，如果有一日band友質疑我嘅「妥協」，我只可以話：「流行並非一種罪過，優雅未必一定要高深，通俗亦可以不庸俗。」
雅俗共賞，就係我嘅答案。
＃是歷盡冷清感受 ＃心內緊扣
在內心交戰期，我又同幾位有意打入主流市場嘅樂隊成員傾訴下。當時Beyond嘅家駒同幾個老友都係做保險經紀，「賣保險工作就係同人溝通，入馬場拉客就講馬，去食街見客就講食。」佢地話：「咁音樂都係同人溝通嘅方式。」
一言驚醒，如果要被主流市場接受，就要用大眾明白嘅音樂語言，唔通去茶餐廳講法文叫波蘿油咩！
解決咗內心掙扎，下一步就係要將計劃付諸實行，我手頭上已經有幾首歌嘅雛形，可以先搵人填詞。不過，成名嘅填詞家我負擔唔起，自己填又無乜信心，計劃又遇到樽頸位。
圖片說明：方丈同Tone & Tone嘅band友渡過不少快樂時光。
P.S.：在此補祝達明一派EP及rock妹36歲生日！原來我地第一隻派台歌唔係情歌，而係昨天生日嘅《繼續追尋》。
圖文©劉以達

indy

方丈尋根記  第二十三回

喺喪屍學堂打躉一年，可以話係難忘嘅修行。
起居飲食，當然睇住荷包做人，例牌每個月買兩本音樂雜誌，日日早晚一罐可樂，加午晚兩餐飯盒，食海鮮鋸牛扒呢D諗都唔使諗。
娛樂方面，最經濟實惠嘅係去隔離房同band友吹水，除此之外行街睇戲、商場shopping、唱K、篤波、落disco呢D流行消費⋯⋯⋯⋯一定無我份。
唯一要使下錢嘅係，非常偶然機會下同band友坐酒吧聽下live music，我又唔係好受得酒精，次次都係叫杯fruit punch就算。
加上我係一個完全唔識玩體育活動嘅人，上得山多遇發哥，去球場你就唔慌撞到我。
所以基本上果一年好似達摩面壁，日夜對住幾部琴同錄音器材，對到好似盲俠聽聲劍，合埋眼都知D製點撳。
我最享受嘅係同老友Ronnie夜晚 jam歌，當時用鼓機、sequencer預先錄好底層部分，我地兩個就用兩部琴即興加料，你彈一段我接一句，可以做到成隊band嘅效果，有時又穿插下一D yiyiyeye哪嘸聲，第二日聽番錄音，又幾似首日文歌。
我估就係玩得多呢D二人哪嘸jam sessions，奠下咗將來搞二人組合嘅基礎。

修行期間，如果對住器材坐禪係第一類接觸，同band友玩係第二類接觸，第三類接觸就係見學生。
喪屍學堂學生唔多，大致上分成兩類：
第一係乖學生，佢地斯斯文文，正正經經，準時上堂準時交學費，態度認真又勤力，我記得有個在外國留學番嚟嘅哥哥仔，真係由零開始學電子音樂，跟足成年，風雨不改，真係模範生。
第二係怪學生，呢類通常都沈默寡言，唧都唔笑，好似隨時會為藝術而犧牲，通常呢類學生最叻，話頭醒尾，舉一反三，不過佢地嘅優點，我就視為缺點，事關呢批人往往學兩堂、摸到個原理同竅門就唔再上堂，即係我又無收入。
不過我亦好理解，因為我自己細個都係上咗兩堂樂理就無再學，真係現眼報。

#你的聲音自遠而近  #故事段段動人

喪屍學堂中期，有個細我年幾嘅小弟弟嚟交學費。
呢個小弟弟，衣著都幾斯文，舉止談吐有禮，耐唔中嘟起兩片紅唇，有少少蔡楓華feel，我覺得佢實係屬於第一範疇嘅乖學生。
不過，三個月後我就將佢喺第一範疇除名，因為佢雖然準時嚟上堂，態度亦相當認真，但交咗一次學費就無再交過。
每一次我想開口提佢交學費，唔知點解呢位小弟弟好似識讀心術，立即鼓動佢嘅迷人紅唇同如簧之舌，一輪嘴帶我遊花園，偏偏佢嘅話題又全部係我有興趣嘅嘢，次次噴完幾噸口水環遊世界之後，我又忘記咗學費嘅事。
另一樣勾起我好奇嘅，係小弟弟每次上嚟，都捧住個麻雀檯咁大嘅portfolio。我都讀過設計，估佢可能係學美術之類，但一直以來佢都無打開個巨無霸portfolio，都唔知裏面裝乜，令我懷疑佢真係日頭去返學，定係去Art Centre扮文青設計師識女仔。

如是者，小弟弟跟咗我四、五個月，由電子音樂原理開始，學到識彈奏識錄音，我發覺，原來佢同我一樣，係單手彈琴嘅獨臂刀。
由於彈琴招式有如天生一對，我對佢起咗三分親切感，加上佢嘅健談，我地相處時間愈來愈多，多到佢唔願返屋企。
有時小弟弟上完堂，第二個學生嚟到，佢就靜靜地戴上headphone，屈埋一角自修，等第二個學生一走，佢就繼續講古。我幾肯定佢每次上嚟都預先做足充分資料搜集，因為佢次次都有D關於英倫音樂嘅新題材，講到天黑都未停口。
喺面壁生涯中，佢嘅環球資訊同世界觀的確為我帶嚟一點新趣，即使佢最終目的可能係暫時麻醉我，但至少佢背後做咗好多修辭功夫，而唔係爛撻撻求其咁話「無錢呀下次先」，換句話講，佢內心都有D D 咁多care我，喺喪屍學堂如此孤寂嘅世界，已經十分難得，於是我又加咗三分愛惜。
無疑小弟弟係非常好學，對電子音樂每個細節都打爛沙盆問到篤，後來先知佢好似住新界，日日咁遠水路嚟學習研究，我又添多三分同情。

某一晚，我同小弟弟又精神上雲遊四海傾到深夜，我怕佢無車返屋企，就話「不如一齊走啦。」
落咗樓，見佢同巨無霸portfolio喺夜色中遠去，我個肚忽然咕咕聲。
梗係啦，夜晚都未食飯，插手扲下褲袋，得番幾蚊雞，咁先醒起，頭先又無叫小弟弟交學費。
好學生同怪學生，我未必記得，但一個半年無交學費但我都歡迎佢嚟打躉嘅學生，我點會忘記，佢大名就係：陳少琪
圖片說明：方丈同陳少琪，由師徒演變成好拍檔，過程當然高潮迭起。
P.S.：方丈聽講好多新開張嘅武館，會有人上去踢館，咁方丈開新音樂研究社，又有無人特登嚟挑戰呢？結果係一次都無，可能喪屍商場實在威名遠播，無人想嚟搞搞震。另外呢，同方丈哪嘸jam 嘅Ronnie，其實係1983年David Bowie訪港紀錄片嘅男主角，飾演一個變賣唱片籌錢買David Bowie演唱會飛嘅Rock友。
圖文©劉以達
#陳少琪 #方丈

indy

方丈尋根記  第二十四回

方丈叫陳少琪做小弟弟，或者潛意識中，我都幾想有一個玩得埋嘅小弟弟。
我係細仔，唯一嘅親阿哥，係讀書好叻嘅典型理科男，從小我地無乜交流，關係好疏離。
所以，我特別羨慕可以一齊夾band嘅親兄弟，例如家駒家強、阿Paul阿其；即使唔係一齊夾band，得到兄姊嘅支持亦係福氣，例如我在DLLM時期隊友Patrick Chan，佢家姐 Annie經常嚟探班，有時仲同我地彈埋一份。
可惜方丈無呢種「亦親亦友」嘅福份，喺喪屍學堂苦修，需要撐過幾多不為人知嘅孤獨夜，我已經不想細數。
俗語話打虎親兄弟，上陣父子兵，不過歷史上，為自己利益而出賣至親嘅例子亦不少。
方丈只係希望，有一個同心同德嘅親密戰友，一齊殺出個天下；所謂兄弟同心，其利斷金，兄弟係講心，唔一定講血緣。
而陳少琪小弟弟嘅出現，讓我覺得，佢有潛力可以並肩闖一闖。
不單因為佢經常問我有乜未來大計，嘟起紅唇想我「受埋佢玩」，更因為佢眼中有團火花，閃爍出一份其他band友所無嘅強烈鬥心。

＃惟求誠實去看  ＃明白就去做

喺喪屍學堂打躉幾個月，我地漸漸交流多咗，我對小弟弟背景又瞭解多D：陳爸爸係雕塑藝術家，住西貢，可能自細喺文化氣息濃厚嘅家庭長大，小弟弟喜歡畫畫、寫作，但更重要嘅，係我覺得佢好想成名、想一登龍門天下知。
某一日，陳少琪畀我睇佢寫嘅文章，我就順便提議，「不如咁啦，我手頭上有十首八首歌，你試下填詞，當幫我做嘢，抵消番學費。」
可能有人問，點解係陳少琪？
當然，主要原因並不是佢未交學費。
第一，當時得令嘅填詞人，好似林敏聰、林振強等等，收費好貴，聽講有人捧住裝滿成個旅行匧嘅cash，去求林敏聰填一首歌，方丈都可以捧成個旅行匧去，不過一打開全部係飲剩嘅可樂罐啫，況且，就算我不厭其煩三顧草廬、甘願受胯下之辱哀求佢地，人家識我係老鼠咩。
第二，方丈身邊嘅band友，多數有正職，玩音樂係興趣或者副業，唔會有太大野心；即使有部分band友想喺主流市場揚名立萬，佢地已經埋曬堆，有固定班底，我唔可以撬走人地成員。
填詞呢家嘢，係要有商有量，慢慢度出嚟，我就算搵到大師名家高手嚟填，又邊有power去同人地bargain左改右改？

我覺得陳少琪可以一試，一來我地聽歌口味接近，平時又同樣鍾意動漫，算係幾投緣。
二來大家有傾有講，可以由零開始，慢慢塑造一首歌嘅主題同內容，而且隨時可以改完又改，小弟弟都唔會有乜怨言，因為大家都係為隻歌好，只有隻歌好，我地先可以在主流市場佔一席位。
三來，就算失敗咗，以陳少琪嘅圓滑性格同不爛之舌，佢至少都可以做番個受歡迎嘅設計師或者藝術家，佢無乜嘢可以損失。
決定咗一齊拼搏，我地就由每首歌嘅其中一句開始，發展成一個主題同故事。例如《模特兒》，可能我地先有咗「永不足夠」四個字，再諗下一步。呢首歌本身係比較冷峻嘅電子音樂，於是我地想表達高冷嘅時尚，表達一剎那嘅潮流，就創作出一個時裝模特兒在台上受到萬人矚目、但只係一夜風光嘅故事。
不過，萬事起頭難，填詞唔係想像中咁容易。想知過程？下回分解。
P.S.：達明一派第一張EP有四首歌，其實方丈同陳少琪當時已經完成至少八至十首歌，有好多歌佢填咗詞，但最後都無出街。咁方丈有無保留呢D舊作、又或者想唔想聽番呢，答案係無保存亦唔想聽，因為整體水準未過到自己果關。
圖文©劉以達
#陳少琪  #方丈 ＃達明一派 ＃模特兒

indy

方丈尋根記  第二十五回

1984年喪屍學堂時代，方丈畀陳少琪填咗八至十首demo歌，但最後面世嘅只有三首：《模特兒》、《惑星》、《愛的作弄》。
如果大家今時今日聽番無出街嘅demo，可能會好失望，除咗曲詞水準參差，製作亦未夠專業。
達明一派第一隻EP四首歌，全在寶麗金錄音室重新錄製，果度有幾部最靚嘅synth，有專人調音，有後期mastering，同demo係兩回事。如果出咗街嘅歌係絕地武士級數，無出街嘅demo就只係白兵。
EP四首歌，《繼續追尋》demo算係音質最好嘅一首 ，因為呢隻demo在設備較完善嘅佛山錄音室製作，老闆好寬容，經常畀我借用佢嘅先進器材；其餘三首在喪屍學堂錄嘅demo，明顯無咁好質素。
當時方丈做嘅demo，係未有人唱歌，唱嘅部分就用笛聲或叮叮咚咚嘅琴聲代替，陳少琪就戴住耳機，一路聽呢D叮叮咚咚，一路填上啱音嘅歌詞。

我地睇新紮師兄之類嘅戲劇，經常都會出現一個魔鬼教官，當學生大聲嗌「Yes Sir」，閃出凌厲眼神嘅教官就會話：「我聽唔到！」
將學生操到暈陀陀之後，魔鬼教官就指住幾個跑圈跟唔上大隊嘅人：「我嚟呢度，唔係幫你畢業，而係淘汰你！我知你地班人之中，有D係少爺兵，有D練精學懶，有D自以為是，我會一個一個將呢D人踢走！」
方丈對待demo，就好似個冷面教官，將唔夠格嘅曲詞踢走。
首先歌詞一定要啱音，而且多粒字少粒字都唔得，歪音嘅，字數錯嘅，踢走！
詞不達意，踢走！
偏離主題，踢走！
太深奧、太矯情，踢走！
前後風格唔統一，踢走！
用字修辭無亮點，踢走！

陳少琪雖然第一次填詞，佢都算文思敏捷，一兩日就交到一首歌，都幾快手。
總括嚟講，用字啱音方面無問題，部分修辭即使要改，都好快改完。
頭幾首歌都問題不大，我就好似打咗強心針，放手畀曬所有存貨陳少琪填。
方丈亦唔要求文字有幾華麗、意境有幾深遠，但求講到主題，聽落唔太俗套、唱得順口就OK。
填完詞之後，我都會試唱下，唱到某些位覺得唔妥唔順，就再修改。

在選曲方面，我地有一個計劃，約一半係比較穩陣大路、較容易消化嘅情歌，例如《惑星》、《愛的作弄》。《惑星》呢個歌名係陳少琪嘅主意，係隻幾小品式嘅情歌。《愛的作弄》其實有參考「安全地帶」ワインレッドの心（酒紅色的心）嘅節奏，但依家聽番有些少老土。另外兩隻就明顯比較接近歐洲新浪漫電子風，落番重D料，我比較鍾意《繼續追尋》，更甚於《模特兒》。因為《繼續追尋》包含音樂元素豐富D。做呢兩隻電子風作品，最花時間係在鍵琴上百種音效中搵出最適合嘅幾個，可以話佔咗作曲一半嘅時間，都係研究邊D音效拼貼出嚟會產生化學作用。

在歌曲主題同連貫性方面，我地會比較即興，忽然諗起某一句，就由呢句發展落去，唔會限死範圍。「概念專輯」係到《石頭記》先有想法。
有趣嘅係，我地完成咗第一批demo歌，同期英倫Pet Shop Boys亦錄好佢地主打歌《West End Girl》，並且在美國Disco走紅，呢個二人電子組合嘅形式，吸引咗我注意。
P.S.：達明一派第一張EP中，《繼續追尋》同原來demo最大分別，就係EP嘅版本有真人彈Bass，尤其是結尾幾粒音。至於係邊個彈、同點解唔用原本嘅電子Bass，大家要耐心等方丈慢慢講古。
圖片： 填完詞之後方丈會試唱下，睇下邊度要修改。
圖文©劉以達
#陳少琪  #方丈 ＃達明一派 ＃模特兒＃繼續追尋 ＃Pet Shop Boys

indy

方丈尋根記  第二十六回

手頭上嘅demo歌大部分填好詞，我開始想像下，呢批歌應該由咩人去演繹？果個人嘅聲音同外形會係點？
隨手點起支煙拎起紙筆，我就一邊構思、一邊寫低要點：對英倫電子音樂、Art Rock有認識，或者有少許表演經驗，年齡廿零歲⋯⋯⋯⋯寫到呢度，忽然聞到陣怪味，原來我放喺鍵琴上支煙頭，燒熔咗個黑鍵。
我唔係咁迷信嘅人，但係果一刻，好似心中來來回回，有一圈漣漪蕩漾不息。

＃逝去的光陰＃又再重溫

無風的秋季悄悄離去，1984年踏入尾聲，扭開收音機，除咗重重複複嘅兇殺、交通意外，仲有沒完沒了嘅中英談判新聞。我無統計身邊band房朋友之中，有幾多人真係睇過果本中英聯合聲明白皮書，我淨係知道，《搖擺雙週刊》今日出版，又係時候去搵阿Keith葉老闆吹下水，順便攞番本精神食糧。
《搖擺雙週刊》大本營位於北角七海商場，離喪屍學堂好近。不過，喺動身之前，我見到band友留低本英文雜誌，有張相寫住Pet Shop Boys，相中係兩個看來貌合神離、又好似有D微妙關係嘅英國仔，一個望東一個望西，唔夾之中又隱約有D默契。
我攞住本雜誌，行去七海商場，Keith在埋首寫一篇關於Joy Division嘅傳記文章，大家坐低傾下最近有乜搞作，我就提到，作咗批歌，想搵個主音。
「咁呀，登個廣告啦，嗱，好似咁，好多人應徵㗎。」Keith葉畀我睇個廣告，大約四分一版，話徵求新一代歌手，「16至22歲，三年聽音樂經驗，外形好，有個性」，最好笑最尾果句係「要有幻想力，或者覺得自己係音樂天才」。
「幻想自己係天才，實好多人應徵啦。」我話。
「咁你寫段稿畀我嘞。」Keith葉笑笑口講：「咁老友，我實幫你登雞乸咁大隻字，免費。」
同《搖擺雙週刊》競爭嘅《音樂一週》，雖然期期都睇，但我唔太熟絡，聽見Keith葉唔收廣告費，咁就一於登《搖擺雙週》試下，反正我果陣都無銀登第二度。
「咦喂，呢本新嘢喎。」隔離個編輯阿Dave眼尾掃到我帶上去本英文雜誌，老實不客氣一手攞去掀掀下：「呢隊Pet Shop Boys玩電子，有首West End Girls上咗disco流行榜。」

番到喪屍學堂，我拎起頭先寫低張紙，又望下雜誌張Pet Shop Boys相，呢兩個人若即若離、似斷難斷嘅張力幾有趣，「另類電子樂手，誠徵新音樂組合vocal，男性，22至25歲。」我喺張紙度加咗幾項。
思前想後，以往夾band嘅片段又湧上心頭。一隊band四、五個人，意見多多，一定要有個大佬協調同話事，而我，好肯定唔係呢種話事人。
由經濟角度去諗，做場show，四個人均分收入，真係賺得好微，咁如果兩個人分，就好好多。
由細到大我都係獨行俠，兩次組band經驗，令我感受到，幾個人過癮即興玩下，會好開心；即使係船河舞會，都係半工半玩，大家唔會有拗撬，收入微薄都無所謂。
依家講到人生事業，就好難用玩下嘅角度去諗，報館份工無咗之後，我已經好決絕同家人講，以音樂為終身事業，唔係講笑。
既然電子音樂我可以一個人搞曬，詞又有人填，我定下目標，只係搵一個主音，好似Pet Shop Boys，一個後面彈一個前面唱，二人組合都幾得意。
但環顧四周，身邊嘅band友全部彈得唔唱得，唱得嘅外形又唔夠好，外形好又唱得，都去咗參加新秀啦，邊輪到我揀。
吐一口氣，我目光停留喺個燒燶咗嘅黑鍵，呢個琴鍵我好少用，幾乎無撳過，呢一刻，我隻手指慢慢撳落去，燶咗嘅部分，竟然感覺好柔軟好溫暖⋯⋯⋯⋯。

「另類電子樂手／香港新音樂組合，徵vocal／partner，男性，22至25歲，廣東歌為主，對Art Rock有認識，並對英倫電子音樂有濃厚興趣。聲線優雅，無演出經驗亦可。」我喺張紙度又加咗幾項。
時間，隨一根煙消耗，扭開收音機，今次唔係沒完沒了嘅中英談判新聞，而係一把幾清秀嘅聲音：「歡迎大家收聽明曲晚唱，我係黃耀明。」

P.S.：80年代初期，《音樂一週》同《搖擺雙週刊》好似成日打對台，鬥搞D另類concert，好多猛人來香港演出，尤其是1982至84年間，有Depeche Mode、Bauhaus、Japan、Siouxsie and the Banshees、New Order、松武秀樹⋯⋯。真係要感謝兩位雜誌創辦人Sam左同Keith葉，當其時AC Hall亦成為另類音樂樂迷朝聖之地。
圖片： 方丈唔記得邊部琴燒燶咗，有人記得嗎？
圖文©劉以達
＃搖擺雙週刊 ＃黃耀明 ＃明曲晚唱 #陳少琪  #方丈 ＃達明一派 ＃音樂一週＃PetShopBoys

indy

方丈尋根記 第二十七回

緣份呢家嘢，你千方百計想要嘅時候，就打鑼都搵唔到；到你疊埋心水行開咗，佢又意料之外地出現。

記得幾年前，見到個徵band友廣告，我就孭住個結他，膽粗粗衝上去尖沙嘴Mark 1錄音室，結果不但組成DLLM，仲認識咗Ronnie等一大班band友。
到咗今日，輪到人地膽粗粗衝上來喪屍學堂試音，我都係本著隨心而來、隨緣而去嘅心情，因為某一件事嘅成功，係天時、地利、人和嘅混合物，正如電影《Apollo 13》中，太空人阿占以為萬事俱備，登月在望，點知臨起飛，合作慣嘅隊友可能生麻疹，被迫換上另一個新手。阿占嘗試同上司力爭採用原班人馬，但個波士話﹕「只有兩條路你揀，一係同新仔拍檔登月，一係無限期押後計劃。」
阿占諗，自己好難再被選中上太空，只好把握眼前機會搏一搏。
點知就係著陸月球前，一條電線故障竟然整爆氧氣筒，成架太空船廢咗，最後只能同月球擦身而過，執番條命仔已經偷笑，你話係咪整定。

望住《搖擺雙週刊》個徵求主音廣告，其實我同阿占諗法差不多，都係把握眼前機會搏一搏，「一係同新仔拍檔，一係無限期押後計劃。」，阿占面對呢個情況，我真係好有同感。
當一切交畀命運安排時，你唯一可以掌握嘅，就係做好你自己。就好似阿占，即使無登月，至少佢憑着自身功力，克服萬難安全返回地球。

廣告出咗幾日，有十零人打電話約見，其中大部分係路人甲乙丙，即是無論歌藝同外形都未能留下深刻印象，試完等於無試⋯⋯⋯⋯咁實際上係點試音呢？我地會有歌書同樂譜，vocal睇住歌書唱，我就彈住結他伴奏，基本上就感覺一下應徵者嘅拍子、音準、技巧、台風等等。
當然除咗路人甲乙丙，仲有令我一見難忘嘅人，例如阿金。
阿金唔係真名，之所以叫佢阿金，係因為佢現身時，全套黑皮褸皮褲皮靴，皮褸鑲曬金釘，上下掛滿手指咁粗鐵鏈，叮鈴噹瑯行入嚟，你話唔係金屬狂人係乜？
古語話齋，以貌取人，失之子羽，阿金打扮到咁認真，我都嚴肅地攤開本歌書畀佢試唱。
唱唔夠兩句，我見佢搖晃一把鬈髮、張大口狂嗌沙聲高音，最震撼一幕出現：阿金條脷穿有兩個脷環！
我淌下冷汗嘅心暗暗話：「金哥仔，你油白塊面去參加模仿Kiss樂隊大賽應該穩入三甲，唔好玩我嘞。」

一見難忘嘅阿金走咗，又上嚟個潛質無限嘅蘿蔔褲美男。
「嘩！Machi？近藤真彥？」我見一個青靚白淨、gel個「孖池」頭嘅劍眉星目美少年企喺門口。
點知我起身招呼佢入嚟，先見到原來唔係一個「孖池」，係打孖兩個！
「係呀，我地兩兄弟嚟㗎。」大「孖池」話：「我地第樣唔敢講，唱歌跳舞都算幾唔錯。」
「使唔使整個一字馬你睇先？」細「孖池」好似已經拉筋熱定身咁。
「唔使住。」我好婉轉陪笑話：「不如你地輪流唱幾句先。」
老實講，佢地歌藝都不俗，但同我D歌路唔係好夾，佢地似日本Checkers，唔多似我想要嘅Pet Shop Boys。
「好呀今日試到呢度，我地再聯絡啦！」我送咗「孖池」兄弟出門口。
若干年後，我同佢地真係有聯絡，方丈隆重介紹：掌聲有請，蔡一智、蔡一傑！

話說見完一大群男性，心儀嘅主音仲未有緣相會，喺呢度方丈又扯開下話題，其實我喺同時期，曾經有一次試音，係一個女性。
呢個女仔睇落似中學畢業，斯斯文文眼大大，梳個瀏海直髮，周不時向你整個純過蒸餾水嘅淺笑，神態慧黠之中又帶點楚楚可憐，對答反應又好機敏，一句講曬就係「永遠嘅初戀情人feel」。
佢聲音唔算沈厚，係80年代流行嘅日本少女偶像果種甜美可愛聲調。
當時佢唔係想做我partner，試音係唱片公司安排，地點係某大錄音室，不過試完音，果間唱片公司無乜聲氣，聽講個女仔做咗DJ，又係若干年後，我地終於在樂壇相認，佢個名，其實我已經畀咗貼士，周時淺笑、慧黠機敏嘅周慧敏。
方丈好榮幸，我嘅第一次女仔試音，如此珍貴嘅第一次，畀咗周慧敏。

某日下午，方丈正剪輯緊一隻節奏幾快嘅新歌，電子鼓勁到噴鼻血，身旁電話響起：「喂，我係商台嘅黃耀明。」
「吓？商台咩話？」我收細D鼓聲，心諗係咪搭錯線。

緣份呢家嘢，你千方百計想要嘅時候，就打鑼都搵唔到；到你疊埋心水行開咗，佢又意料之外地出現。

P.S.：好多人問方丈會不會出書，答案係有可能嘅，不過，要出書的話，方丈極需要一份歷史文件：呢幾日真係翻箱倒櫃，打鑼都搵唔番《搖擺雙週刊》果個徵求主音廣告，希望有緣之人，可以提供呢份珍貴歷史文件，刊登時間是1984年秋／冬。
圖片： 想知方丈點解鏟青咗個頭，請繼續追落去。
圖文©劉以達
＃黃耀明 ＃草蜢 #周慧敏 #方丈 ＃達明一派 ＃PethopBoys

indy

方丈尋根記 第二十八回

＃尋覓遍遠近　＃何用人牽引

「吓？商台做咩話？」我果陣修改緊隻新歌，忙到想用埋腳趾彈琴，聽見商台又乜又七，幾乎想掟電話收佢線。
「我係商台黃耀明，我睇到你個廣告呀。」果便就不慌不忙咁講：「我地可唔可以約個時間呢？」
聽見呢個名，我諗起啦，次次都講「由而家到十點，明曲晚唱」個DJ嘛，成日播Brian Eno果個。
「係呀？咁你⋯⋯⋯⋯」正想問佢今晚又播唔播Brian Eno，因為我講嘢慢兩拍，佢已經先發制人：「你係咪劉以達呀？其實我都聽過你D音樂，果隻《香港》大碟，我喺節目度有播過，我幾鍾意英國電子音樂嘅，香港玩電子音樂唔係咁普遍呀呵。」
咦，乜佢已經起咗我底，佢點解知道係我搵人呢？
不過，我就故作鎮定，「係呀，想搞個電子音樂組合，不如你過嚟試下音先，我喺北角百樂戲院附近，你知唔知邊度？」
「哦，百樂戲院嘛，我知，我成日去睇戲嘅，咁約個時間喺百樂等啦，我諗我會認得你嘅，《香港》大碟有你幅相。」
嘩，忽然我有一種畀X光機透視嘅感覺，好似一絲不掛、赤裸裸行咗入去人頭湧湧嘅信和中心咁。
唔得，佢起咗我底，為咗平衡一下心理，我都要起番佢底！
於是，在電話中約實時間之後，我就番彩虹邨搵曬D舊報紙、摷勻D娛樂版呀乜乜週刊呀，睇下有無關於商台嘅消息。
「有嘞！」原來商台有個活動，成班DJ著住運動裝，排排企唔知搞邊科。
攞住張大合照，我就四圍問下人，band友都無乜頭緒，但係有個成日上商台嘅雜誌記者，手指指督住個青靚白淨嘅書生哥哥，語氣堅定咁話：「呢個係黃耀明。」
「係咩？真係？」
「係佢嘞，唔通盧業瑂咩！」
咁比起隔離幾個，黃耀明個樣又幾四正，「佢個人點㗎？」
「都幾斯文嘅，不過同佢唔熟，無乜兩句，佢同熟果D人就好多嘢講。」雜誌情報員話：「阿611（林憶蓮）走咗去唱歌，佢頂上，好似仲做埋早晨星期一㖭。」
我記得間中有聽《早晨星期一》，半夜三更播埋D古靈精怪電影soundtrack，喺喪屍學堂聽就零舍覺得陰風陣陣，咁我又唔介意，起碼佢好似幾鍾意冷門音樂，應該唔會上嚟rap住唱「火加熱就等於我」⋯⋯啩。

到咗「相睇」大日子，行落去百樂戲院，街邊得幾個阿叔，我就入去戲院大堂

indy

方丈尋根記 第二十九回

＃以歌解愁　＃疑惑我想透

黃耀明準備咗張十二吋大碟，係當時得令嘅Culture Club，不過呢張碟Side A單曲，唔係佢地大熱之作《Do You Really Want to Hurt Me》，而係1983年初嘅Time (Clock of the Heart)。呢張十二吋碟我都未見過，特別之處係Side B有首歌叫《Romance Beyond the Alphabet》， 其實就係Side A首單曲嘅純音樂版。
當年卡拉OK唔太普及，自備純音樂嚟做唱歌backing，黃耀明係咁多個應徵者之中嘅第一人。後來我聽番呢隻純音樂版，發現音效係比Side A首單曲少咗一層，即係簡化咗，但咁樣反而可以令歌者vocal更突出。
用Boy George呢首輕快嘅歌嚟做熱身開聲之後，佢問：「覺得點呀？OK嘛？」
我估佢都未出真功夫，就話：「可以繼續下一首。」
今次，明仔就攞張Wham! 出嚟，係George Michael在1984年夏天唱到街知巷聞嘅《Careless Whisper》。
我知呢首歌唔係咁易唱，副歌係用連串高音，層層推進，揀首咁高難度又咁大熱嘅歌，係咪會出真功夫呢？
見佢又係用Side B純音樂，我都要展示下功架，即刻左右開弓，極速將唱盤同咪線駁好，再一個飛魚轉身，撻著所有四聲道立體聲嘅錄音掣。
換句話講，我用四聲道「試當真」，好似灌唱片咁錄音，睇我摩打手No Look撳掣嘅招式，就知食過夜粥，唔係柴娃娃：「你嚟料，我都出招，即時錄你音。」
果然，佢唔使降key，一路駕馭住高音，唱到「please stay」果句，真係合埋眼肉緊到⋯⋯可惜果陣係卅幾年前，未有手機錄影，否則擺上網肯定點擊爆燈。

兩曲既罷，得出結論係，明仔係「感覺派」多過「技術流」。
我見過好多炫技嘅歌手，唱到震天花板，哀怨動人，但音樂一停，就若無其事繼續撩牙打麻雀叫碰。明仔嘅處理係另一類，佢當自己係首歌嘅主角咁，揣摩當事人嘅心境，全情融入首歌嘅氣氛，而唔係單單用技巧嚟堆砌出感情。
不過，我有少少覺得，佢帶兩隻碟上嚟，之前應該係用呢兩首歌操練過一排，不如即刻畀個突擊測驗，試下佢臨場反應。
「呢度有本中文歌書，我地又玩下中文歌。」
突擊測驗係想睇佢廣東話唱腔，隨機抽咗兩首歌，心諗「你有唱功，我都有彈功。」為咗適度顯示我係認真嘅樂手，拎起個結他，又勾指又掃chord，同明仔即興玩咗兩首慢歌。
呢個情況，真係好似2017年達明合體在德國Hansa Studio錄《Heroes》，間房得我地兩個，我彈結他伴奏，明仔唱到好投入⋯⋯⋯⋯如果拍戲，將2017年Hansa Studio嘅場景慢慢淡出，然後淡入卅幾年前青澀地試音嘅達同明，加上俞琤旁白：「無論係三分鐘，抑或三十年，時間，對大家都係咁公平！」⋯⋯我估會相當感人。

之前，我已經試過十幾人，累積咗咁多試音經驗，正所謂「經一事，蔡一智」，互相無feel就無謂浪費青春，好多人唱完第一首就畀我叮走。
睇下個錶，嘩，原來黃耀明都試咗超過半粒鐘，即係有feel啦。
呢個世界，我選擇人，人亦選擇我，見明仔唱得咁high，梗係要畀番D回饋，我就問：「你有無興趣聽下我做嘅新歌？」
「好呀，香港真係無乜人玩電子音樂。」
「電子，仲要係廣東話唱。呢首叫做《模特兒》，歌詞都填好咗，你聽下。」
喇叭傳出《模特兒》前奏迷幻嘅鍵琴，我地隨住節拍，大家都不約而同un下un下，對視一眼。
呢剎那間嘅會心一眼，亦為我地卅幾年嘅合作，譜下第一個音符。

然而，就係試音出現曙光之際，喪屍學堂出現咗一次危機。

P.S.：2017年達明一派為配合演唱會宣傳，去咗德國Hansa Studio，方丈用結他伴奏，明哥翻唱Bowie作品《Heroes》，喺呢個歷史悠久嘅錄音室，方丈因為大感冒，未能好好感受錄音室嘅氣氛，但因為好耐無單獨同明哥伴奏，反而諗番以前嘅青蔥歲月，我地就係咁樣，一支結他、一把歌聲，以最簡單嘅方式一齊創作。
圖片： 方丈同草蜢真係「不試不相識」，草蜢三子曾經翻唱達明一派嘅《天花亂墜》，方丈好喜歡佢地嘅演繹。
圖文©劉以達
＃俞琤 ＃黃耀明 #商台 ＃明曲晚唱 ＃百樂戲院 ＃試音 ＃草蜢＃方丈 ＃達明一派 ＃Hansastudio ＃Heroes  ＃Boygeorge ＃Carelesswhisper

indy

方丈尋根記 第三十回

＃哎吔吔  ＃哎吔吔吔

「達明一派」於1990年發行《神經》大碟，有一首好似童謠嘅歌《十個救火的少年》，內容講本來有十個人去救火，點知因為種種唔知係乜理由嘅理由，走下一個、走下又一個，最後剩落三個人決定捨生取義，可惜佢地壯烈犧牲，仍然未能喚醒其他人嘅良知， 反而落得千古罪人嘅罵名。
咁悲涼嘅歌，用兒歌方式唱出嚟，就更添荒謬同諷刺。
其實，類似十個救火的少年嘅故事，早在1985年已經發生在方丈身上。
黃耀明試音試咗幾乎成粒鐘之後，我無乜高深嘅睇法，好簡單，結論只有兩點：明仔唱歌有自己一套，第一佢唔會模仿人，第二亦無乜人可以模仿到佢。
換句話講，佢唱George Michael嘅歌又好，唱小鳳姐D歌又好，都可以將原作變成「黃耀明版本」。而佢自成一派嘅唱腔，我幾十年嚟聽過好多人扮乜物天王扮得好似，但從未聽過有人可以扮黃耀明扮到幾可亂真。
就喺尋找主音歌手嘅曙光初現之際，哎吔吔，哎吔吔吔⋯⋯！
本來喪屍學堂有大約十個學生，方丈衣食交通，全靠佢地嘅學費，踏入1985年，呢班學生好似撞邪咁，一個話身體唔好，兩個話移民，四個話讀書工作太忙，剩番三個呢，有一個上上下堂忽然喃喃自語，跟住喊咁口話失戀要跳樓！
剩番最乖果兩個，都跟足咗我年幾，老實講，我亦無乜新嘢繼續教佢地，堂堂自修搞到我都唔好意思。
正在頭赤搵緊新教材，電話響起。「夷咦！終於有學生！」我梗係全身血脈賁張，飛身撲去個電話度。
「喂？阿Tats，你借咗我部琴好耐嘞，我老豆問我部琴去咗邊呀！聽日我上嚟攞番先，驚畀佢鬧。」
一聽見要元璧歸趙，我正話谷起嘅肌肉全部萎縮曬，天要落雨，阿媽要嫁人，呢個世界原來有好多嘢我無得控制。

而家個個驚新冠病毒，1985年果陣，個個驚嘅係愛滋，因為當時有關知識唔普及，好多人仲未知點傳染，搞到人心惶惶，廁板都唔敢坐。
「Tats，我部琴係咪喺你度呀？我上嚟攞番先。」以上呢句話，就好似當時嘅愛滋病，我都唔明點解會傳染，一個問完，另一個又問，跟住個個都問。
「唔好問啦，我就快世紀絕症上腦啦！」掟鬼咗個電話落地，我終於明白中學國文老師講嘅「四面楚歌」點解。
望住黃耀明留低嘅電話，點同佢講呢？如果佢辭咗電台工作，我又無足夠器材錄唔到vocal，咪累街坊？( 之前我做嘅demo係無人唱，要錄埋明仔唱，一定要重新混音。）
再三考量，我都係要自救先，就喺黃耀明等我電話，等到花兒也謝了嘅時候，有個救星出現。
大家仲記得方丈作過勤學活力嘅兒歌？無錯就係發行兒歌個老闆，叫我上佛山做嘢。
於是方丈一個禮拜之中，兩日安撫下陳少琪，兩日教兩個乖學生，三日要上佛山搵食，順便借佛山老闆D器材嚟編曲。
食飯問題暫時勉強解決，但混音就唔夠器材，我只好將之前做落嘅音樂例如《模特兒》、《惑星》等，拎上佛山錄音室，將原本四聲軌，濃縮落兩條聲軌，咁就可以留白兩條軌畀明仔唱主音同和音。講好似好簡單，但係要足夠器材先可以混得靚聲，否則就好似用土炮雙卡式錄音咁，《模特兒》都變成《模糊移》。

在佛山流連嘅時候，我諗起仲有一隻歌未改好，於是趁有空檔，連夜執漏，居然又畀我試下撞下，又撞出一個未來，呢首在佛山錄音室大功告成嘅歌，成為我事業上一個好重要嘅轉捩點！
方丈貼士：呢首歌係四拍四快板，唔似電子嘅電子，強烈Funky、跳脫節奏，加結他怪chord。最後一粒音係bass結他。

P.S.：方丈做歌，會留番兩條聲軌畀主音同和音，例如《模特兒》，女聲和音係何秀萍，另外陳慧嫻、Beyond樂隊都曾經現聲在和音中。
P.P.S.：寫完一篇、叫個包食先，今日你地試食咗減鹹包未？
圖片： 達明「相睇」同起底之後，其實隔咗幾個月都無聯絡，雖然呢個世界原來有好多嘢我無得控制，但要番嚟嘅一定會番嚟。
圖文©劉以達
＃十個救火的少年 ＃黃耀明 #商台 ＃明曲晚唱 ＃試音 ＃陳慧嫻 ＃Beyond ＃方丈

indy

方丈尋根記 第三十一回

＃時鐘停止  ＃我在耐心的等待

1985年春天某個午夜，收音機傳來一把聲音，劃破喪屍學堂嘅寂靜：「黃耀明相信，你之所以喺深夜時份，同我約會聽音樂，係有特別原因。」
伴隨Japan樂隊《Night Porter》前奏鋼琴聲，呢把聲音幽幽道出：「原來，黃耀明已經守護咗五十個星期一嘅凌晨。」
我聽過《Night Porter》不下百次，但喺呢一刻，我乜都無做，只係靜靜佇立，聽到最後一下音符在冷巷嘅回響。
時鐘停留喺凌晨一點半，我掹走插蘇，腰斬咗收音機播緊嘅Frankie Goes to Hollywood。
呢一晚，係黃耀明最後一次主持「早晨星期一」；呢一晚，亦都係我同喪屍學堂說再見嘅時候。

時運不濟，勢估唔到在關鍵時刻，流失咗大半學生，我再無法負擔學堂經費，只好收拾僅餘嘅零星器材，默默離開。
一個人在途上，我又有些少擔心明仔，唔知點解佢無繼續做節目，「會唔會辭咗DJ份工呢？佢又會唔會搵到其他人組樂隊？定係好似D學生咁搞移民？」心裏滿是疑團，但又未能開口解釋我當前嘅困難， 每次見到明仔留低嘅電話號碼，我內心都掙扎，打唔打好呢？但每一次，我都轉身逃避咗，或者，隱藏自己嘅內心世界，已經從初中時代做獨行俠開始，成為一個習慣。

從上次試音嚟睇，我地係有D化學反應，如果唔信任佢，我就唔會畀佢聽《模特兒》嘅demo，因為呢幾首歌，可以話我事業上嘅孤注一擲，一般我係唔輕易露出幾隻底牌，尤其《模特兒》呢隻「扱手King」，除咗填詞嘅陳少琪，就只有明仔聽過。
不過，塞翁失馬，雖然喪屍學堂「灰飛似煙」，我又搵到佛山錄音室嚟「偷生寄居」，一個人一支結他，我望住條九廣鐵路，思潮起伏，盲摸盲撞竟然摸番隻「扱手煙士」。
呢隻歌，我喜愛程度比《模特兒》更甚，聽下聽下，又燃起鬥志，於是快快手手，將幾首比較滿意嘅歌重新混音，留番一條聲軌，畀明仔唱。
但隔咗幾個月，佢仲會唔會有興趣？萬一佢唔得呢？唔知點解，我完全無準備「士啤胎」，就好似明仔係節目中講過，我相信人之所以相遇，總會有一個原因。

對方電話響起，我深呼吸一口氣。
「喂，我係劉以達，記唔記得我呀？」
「係你呀，乜咁耐都無覆我嘅？」
「係呀，唉，有D阻滯，咁你而家嚟唔嚟得？」
「我仲以為你搵咗第二個㖭，我得㗎。」
「得就嚟囉喎！」

有時做人嘅嘢唔需要長篇大論，三句話，就可以緣定半生。

信教要領洗，出家要剃度，小朋友讀書都有開學禮，1985年復活節左右，我擇定個良辰吉日渡明仔升仙，呢個入band儀式，主題曲非常有意義，係《愛情陷阱》。
點解係《愛情陷阱》？因為呢首歌好熱鬧，無論結他、鍵琴、鼓擊都輪流有機會發揮，好適合夾band，喺咁澎湃嘅樂器伴奏之下，就更加考驗主音嘅耐力，少D氣都唱唔到急口令果部分。
唔似大家有無聽過「態度決定一切」呢句話？其實，我知明仔鍾意冷門歌，《愛情陷阱》咁Pop嘅熱門歌唔多係佢首選，但係要佢試呢首歌，就充分可以睇到佢作為主音嘅態度。究竟會hea住唱、定係一如以往咁盡力咁投入？
搖擺精神，有時唔係你fing得幾行、嗌得幾大聲；Rock，就係你有無令人感染到永遠堅持、永不放棄、永不妥協嘅精神同態度。

我地去到喪屍商場嘅Tone & Tone，鼓佬加幾個band仔已經扭盡個擴音機招呼明仔，間房好細，迫咗五、六個人，但係我覺得氣氛好似喺政府大球場開騷咁，既興奮又充滿未知數，鼓佬舉起兩碌棍開始敲住倒數：「3、2、1⋯⋯」。
過程我無必要講太多，我只需要講結果：夾完超Rock版《愛情陷阱》，明仔三日都失咗聲。

入band儀式之後，我覺得我可以正式宣布，搵到個parter。
就好似潘sir嘅歌詞，就算前路係「偏我遇上」嘅陷阱，我至少都有個同伴。

P.S.：2003年嘅「黃耀明滿天神佛攞命舞會」，我地重演咗1985年入band儀式唱《愛情陷阱》一幕，音樂平台應該有得下載。
圖片： 方丈同佛山錄音室好有緣份，除咗經常有散工打救我，老闆仲介紹咗個上海女仔我識，呢位好唱得嘅女歌手，好多年之後，參與咗我《秋月》、《麻木》專輯。不過勢估唔到，因為《麻木》要搵Pal哥彈bass，方丈仲做埋月老，撮合一對佳人，無錯佢就係Pal嫂胡蓓蔚。
圖文©劉以達
＃早晨星期一 ＃黃耀明 #商台 ＃明曲晚唱 ＃愛情陷阱＃試音＃方丈 ＃Pal哥 ＃胡蓓蔚

indy

方丈尋根記 第三十二回

＃雨飄風同舟 ＃苦中可忘憂

1985年踏入夏天，band界風起雲湧，「小島」已經冒出頭，「Beyond」又密鑼緊鼓開《永遠等待》concert，我就好似隻蝸牛，孭住個四軌錄音機，周圍搵錄音室。

由於無乜錢剩，剛開始錄demo，只能番彩虹邨，或者上黃耀明屋企做。佢同家人住在牛頭角半山，有零錢我就搭小巴上去，無錢我地就兩個人一齊拎住錄音器材撐斜路。其實，呢度因為不在大馬路，環境清靜，幾適合錄音。第一次入到屋，擺咗D器材喺客廳，明仔就叫我入佢間房。「哦！佢自己有房㗎？」⋯⋯不單只有，仲好大，有好多卡帶同唱片。
喺彩虹邨，東南西北四面牆一眼睇曬，我嘅「房」就係碌架牀下格，客廳打開張摺檯就係飯廳，入到明仔果間有門有窗、真正嘅私人空間，我除咗有D羨慕，又聯想起達利有幅藍天同密室嘅畫，一個奇怪念頭浮現：「我地呢個組合，或者可以取名叫『空間』？日本有個『安全地帶』，香港都應該有個『藍色空間』！」
之後好幾次去明仔屋企，佢又介紹咗個新朋友：「呢位係Wallace郭啟華，想嚟睇我地錄音。」
原來Wallace係觀塘區街坊，成個文藝青年咁，對我地呢種古靈精怪音樂好似幾好奇，坐喺一旁靜靜觀察。唔知係咪耳濡目染，Wallace後來都組成「新青年」樂隊，亦成為「達明一派」首次紅館演出不可或缺嘅助力。
錄音器材說多不多、說少不少，基本係部四軌錄音機，駁上一個混音器，加上支咪、耳筒。通常我用最貴果隻卡式「鐵帶」，當時幾十蚊一餅，不過幾肉赤都要，食飯可以慳但做歌呢D唔慳得。
背景音樂部分我已做好，佔兩條軌，剩下兩條軌就畀主唱同和音。明仔錄歌都幾快手，對於佢嘅歌聲，我亦無乜要挑剔嘅地方。錄咗一兩隻歌之後，陳少琪聽到歌詞有把咁優美嘅聲音唱出嚟，振奮程度就好似細路第一次著西裝去拜年，自豪嘅感覺又好似人生第一份工作可以周圍派卡片！

最近睇緊坂本龍一嘅紀錄片，不自覺地，我將「YMO」成軍過程同「達明一派」比較，發現一D有趣嘅地方。同明仔一樣，坂本龍一鍾情歐洲新浪潮，巧合地又做過播冷門音樂嘅電台DJ；而高橋幸宏同細野晴臣，同我一樣，係靠雙耳自學嘅band仔。
不過，「YMO」三個人組團之前已經好熟絡，但我同明仔，由陌生人開始，一直到出唱片，關係都仍然好陌生。
同坂本龍一有D相近，明仔係一個非常自我、不喜歡受世俗或大企業規條約束嘅人，佢可以好客氣好主動，呢個可能源於佢細細個已經在父親嘅食店幫手，但呢份主動只係表面假象，佢唔會輕易開放自己，就正如佢果道房門，明仔經常處於一個受保護空間，某程度上，佢內心有好多關卡，唔會交淺言深、更唔會受人擺布。
而我自小就係獨行俠，社會大眾眼中嘅異類，只有喺音樂世界，我先可以如魚得水，由於習慣咗與世隔絕，加上一貫沈默寡言，我同明仔嘅交流亦始於音樂、終於音樂，除咗工作，實在無乜深入對話。反而口水多多嘅陳少琪，同明仔更有偈傾，反正佢地D話題我興趣不大，就樂得陳少琪去entertain明仔，我就專注做音樂。
「YMO」嘅音樂，係三人互補而成嘅fusion，因為高橋幸宏同細野晴臣係band仔出身，佢地缺乏坂本龍一所擅長嘅歐式格調；反過來說，坂本龍一亦唔擅長Pop band果種流行音色，每當高橋同細野討論某隊流行band嘅節奏，坂本就一頭霧水，要買唱片惡補。
達明就有D相反，我地聽音樂嘅口味好接近，所以每當討論，大家舉例講邊隊邊隊band係點做，一聽就心領神會。喺工作上，我地分工好清楚，音樂係我負責，演繹係明仔負責，就好似電腦主板需要個芒去顯像，個芒又需要主板去運算，有內有外，先夾成一部完整嘅電腦。因為性格同生活喜好嘅差異，我地只會在工作時見面，無乜內心交流，但就因為呢種陌生得嚟又合拍嘅特殊關係，我地可以非常專注於音樂上。總結而言，喺達明最初嘅奮鬥日子，我同明仔係互相扶持嘅戰友，而唔係促膝談心嘅密友。
當然，單純唱廣東歌嘅達明，由理論、技巧、器材、閱歷以至市場規模，完全難以同「YMO」相比，得到國際認同嘅「YMO」三人都係精英份子，能夠在世界市場佔一席位當然有雄厚實力，話說回來，如果有一間歐美國際大公司做後盾，而我地又做英文歌，達明會唔會成為世界嘅「一派」？老實講，我地無盤算過，由始至終，我地都堅持廣東歌，正如1984年我在《結他》雜誌寫嘅文章《反省搖擺與流行》中提及：「廣東歌如果去除偏見，其實不失為屬於香港人的普及藝術，用自己的語言（廣東話）來反映我們的潮流與文化，就是音樂的價值所在。」
P.S.：唱廣東歌，一直係達明共同嘅宗旨，如果我地嘅音樂都慰藉唔到長於斯嘅同鄉，得到世界又有何用？

圖片： 1985年開始，可以話係香港地下樂隊破土而出嘅茁壯期，「小島」（之後的「凡風」）、「Beyond」、「Trinity」（之後的「太極」）、「浮世繪」、「新青年」等等成員，都係相識於微時，每到大型演出經常互相幫忙。呢張相係《100分》雜誌封面，大家又數到幾多個名字？

圖文©劉以達
＃小島 ＃Beyond ＃太極 ＃新青年＃黃耀明 ＃陳少琪 ＃郭啟華 ＃安全地帶 #YMO ＃坂本龍一

indy

方丈尋根記 番外篇

大約在參與灌錄《香港》大碟時期，我已認識阿Tim，亦即係「永聲唱片公司」老闆黃懷欽。當時我醉心於研究電子音樂同器材，同外界與世隔絕，根本唔明點解阿Tim咁厲害，可以喺佛山創立一間咁先進嘅錄音室，我有少少以為，佢係戴咗眼鏡嘅超人，可以喺電話亭變身。
阿Tim唔係超人，佢係香港人，好耐之後我先知道，原來佢在台灣讀過書，居然又可以搭通天地線，上去佛山投資開廠，屈指算來，佢應該係第一批乘住改革開放之風北上發展嘅港人。
佢可能睇過我的演出，但唔知點解佢會搵我做嘢，而且係做兒歌，總之就從《勤學活力歌》開始，我透過阿Tim，與侯德健、黃耀光以至中國大陸搖擺先鋒崔健等人結緣，可想而知，阿Tim當時真係認識好多猛人，蔡琴同崔健之所以為港人認識，阿Tim係大力推手。
在我決心在音樂方面發展之後，一邊教學，一邊繼續做阿Tim嘅「free欄士」賺外快，甚至在我最落魄嘅時候，阿Tim容許我使用佢嘅先進錄音器材，完成咗好多demo。作風低調、健談又平易近人，阿Tim真係完全唔會擺老細架子，有一次，佢就笑笑口話要介紹個女仔我識。
記得呢位北方女仔嚟試咪，音色靚唱功勁，原來佢係讀聲樂科班出身，有沙紙嘅。
過咗好多年，我想搞一隻比較實驗嘅專輯，諗起有一首歌好啱呢個女仔唱，錄音當日，佢要求升key，但係我就堅持唔升，因為呢首歌要有一種神秘感、發出似喊非喊嘅低音先有氣氛。結果，佢成功用真假音互換，完美地錄好咗，呢首歌叫做《了了》，唱嘅就係胡蓓蔚。
其實在做《了了》之前，有間新成立嘅製作公司，想搵我搞隻有懷舊風味、但編曲又要有現代感嘅國語專輯。我覺得可以駕馭到嘅人，第一個就係諗到胡蓓蔚。
呢隻專輯《今天後天明天》，同上海和平飯店嘅老年爵士樂隊合作，呢班老前輩好可愛，總之個大鐘踏正六點，佢地無論演奏到邊個部分，都一定全體掟低所有樂器，「噚」一聲就離開曬錄音室。
以下一段文，係我介紹《今天後天明天》嘅短文，當年係印在卡式帶嘅封底，現在可以同大家分享一下當時製作嘅點滴。

我和Red Cat Entertainment同事、胡蓓蔚及和平飯店老年爵士樂隊合作，可說是巧合加巧合加巧合，最初我們想錄製一張絕對懷舊的作品，但在上海工作過程中，新念頭不斷浮現，我們最後把製作方針改為一張既有上海懷舊風格、又有90年代、容我稱之為「極端主義」精神的作品。
這亦表現了製作的景況，來自香港的監製，在90年代，跑到經濟自40年代起飛的上海，找來一隊老年的爵士樂隊，卻為一個年輕上海女孩伴奏，唱的歌有40年代老歌，也有最新的創作，如此奇怪的組合和狀況，給予我們很多啟示，對所有參與者都是寶貴經歷。
關於歌手胡蓓蔚，一方面她有配合年齡的爽朗直率，另一方面又帶點不大適齡的世故。看似衝突的兩種性格，放在她身上又總是調和得可愛。錄音的時候，她擔心別人把她當小女孩般呵護，會說「你們不要不好意思呀，我唱得不好要告訴我。」
這小女孩對自己要求很高，錄音室中的努力是個明證。
她十二歲時接受正統歌唱聲樂訓練，老師的要求十分嚴格，音唱得不準是要挨罵的。到了廿一歲，良好基礎訓練使她擁有完美準繩唱腔，但卻遇上兩個監製：奇怪的韋啟良和神化的劉以達，他們認為胡蓓蔚的技巧很好，現在要學習感情的表達，還要是放任、不大計較音準的演繹。對於這種與她所受訓練背道而馳的指示，她有點摸不著頭腦，但也盡力嘗試，結果是讓專程來教她法文的教授Louis也不禁稱讚：「她真是個聰明的女孩！」
在錄音過程中，她就如溫暖和煦的陽光，得到所有人的喜愛。

P.S.：「永聲唱片公司」除咗兒歌，亦大力推動香港校園民歌，老闆黃懷欽四十多年來一直默默為香港音樂做事，可惜去年突然病逝。懷念您，阿Tim。
圖文©劉以達
＃永聲唱片公司 ＃黃懷欽 ＃侯德健 ＃崔健＃蔡琴 ＃黃耀光 ＃胡蓓蔚＃了了 #今天後天明天 ＃和平飯店老年爵士樂隊

indy

1984年嘅秋天，我認識呢位朋友，至今38年，他是我半生拍檔，今日踏入耳順年，祝福你內心有真正的快樂和平安。

indy

（不知道什么时候网上版本会出现....达哥要变现没有办法啦）


洛枫


收到了終於，之前預購的，香港流行音樂作曲人劉以達的《方丈尋根記~前傳》！盒面有達哥的金色簽名，翻開裏面，首先看到是《Music Tats Lau》CD，有16 個曲目，分別是Passion激情、Dream夢想、Rock搖擺、Shadow影子………許多心路歷程。放入唱機，迎來俞琤讀出序言的聲音，接著流出迷離的電子音樂瀰漫整個房間……另外還有兩張明信片，獅子山頭下是達哥的成長地彩虹邨。其實再再之前，我在Facebook斷續讀到達哥的回憶錄，非常驚艷於他很活潑到位的敘述，能夠將港式廣東話玩到出神入化，看得出他很愛這個地方，而那些很達哥的幽默非常抵死，字裏行間發射許多世俗智慧，看得人心花怒放！作為一個敲鍵盤的音樂人，達哥的文字功夫很靈活，有自己的風格和個性，真係好方丈style，祗此一家，難於模仿！書是「前傳」，那是不是說還有正傳和後傳？繼續期待！~洛楓©️Facebook 2022

indy

方丈引發：80年代香港聽歌寫字追周報笑淚史
#香港身份流行育成  #文佬笑淚史  #歌舞聲明

0
為响應方丈尋根，音樂問底，呢輯以方丈tone細數同一個80年代之香江流行歲月，電音狂人、雜誌怪咖、電影痴漢、周報書生，點樣假假地竟然成為咗當年香港文藝青年（當時未有文青呢個寶號，而家呢批當年文青，大概都可以叫文藝中佬，簡稱文佬），上高山落信和，逐步又有機會投入去各瓣創作產業嘅香港流行史前史：

1
1984年嘅雨係迷惘嘅，但1982年呢，就輕鬆好多。

仲未有日後嘅各種前途煩惱，當年嘅大熱電影係《投奔怒海》，《歡樂今宵》惡搞佢做《頭崩怒海》（同幾年後惡搞達明一派石頭記有得fight , 正所謂：唔止「家和萬事興，家駒口不停」，仲有句「未曾酒醉已清醒，撻成一塊已忘形」）。

當陣時，唔覺得悽慘，因為投入咗阿Lam 個日本記者角色，冇諗到香港人有日會做頭崩嗰個。
嗰陣真不知人間何世。上到中學，唔使煩會考住，可以各種愛好都發掘下。男嘅扮波格戴起Head Band 打網球，女嘅着住顏色Leg Warmers學珍芳達跳健身舞。開始學人聽Classic Rock , 人哋聽Hotel California 係研究邊段結他鍊得夠勁，我就同同學研究埋啲歌詞，想學人聽歌學英文？一半，另一半係覺得啲歌詞古古怪怪唔知嗡乜，但又好似勁有深度。
譬如You can checkout any time you like, but you can never leave 究竟係乜意思；又或者Sound Of Silence嗰句經典：People talking without own speaking. People hearing without own listening 借勢放到composition 堂交作業又實加分；爭論最多係 I’ve Never Been To Me 呢一句少女心事：Sometimes I've been to crying for unborn children that might have made me complete. 嘩，咁幾條麻甩佬响度爭論，究竟佢係指抱憾生為女人，冇生到仔唔係咁圓滿，定係本來有個仔但後來冇生到出嚟呢？總之個場面都幾《落水狗》開場咁款。

但相比起1981-1983年聽到嘅聲音之後，之前嗰大批Rock 嘢就忽然變得過份傳統。
呢支嘢就係電子音樂，後來佢哋話，叫Syn-Pop。又或者發大嚟講，又唔單止係Syn-Pop，而係成個叫新浪漫風潮，即係New Romantics，主要又都係嚟自英倫嘅節奏同組合，當時最震撼係三大首：Human League嘅Don’t You Want Me(1981) ，New Order 嘅Blue Monday（1983） ，同埋Depeche Mode嘅See You （1982）， 其實仲有 Yazoo嘅Don’t Go (1982） ，同更早啲嘅 Ultravox （至於Kraftwerk 係之後至補聽番），所以話 1980年代初早期，真係可算流行電音第一高峰。香港當日嘅文青，好多就係沐浴响呢陣英倫吹來嘅電風同新浪漫之中，扭轉咗一生所好。有啲，之後成為音樂人，有啲，就開展寫嘢生涯。

2
不過回番帶，1982年，主流其實仲係聽粵語歌嘅，因當時粵語歌壇都好生猛。所以嗰種電子新聲音就好似係有啲與眾不同。

點都想進一步知多啲呢啲新嘢，當時其實冇乜選擇，只能夠自己留意。譬如聽電台，除咗間中為做功課聽BBC之外（但整整下變咗聽BBC嘅Peel Session歌單, 佢哋竟然推Joy Division；情況或者等如若係當時香港電台會專門播方丈DLLM時期嘅創作一樣前衛。所以話，走BBC路綫係冇乜錯！但返唔到轉頭啦！），就係特別關心播英文歌嘅香港節目。其實當時商業二台（未改叫903之前，叫住CR2先）幾個DJ都幾有音樂知識功力嘅，譬如Angel Leung，都趁得起Music Angel 個朵嘅。陳小寶播嘅係Contemp 嘢多，不過口味都廣博。較多播英倫呢期好嘢嘅阿志淙同梁兆輝仲有明哥要後幾年先至出現。
有趣嘅係，當時其實冇乜話另類或大路，就算係平日普通節目 ，有時都會無啦啦整首冷門嘢。所以話，其時聽歌，係當佢見聞會社：增廣見聞。

點樣增廣見聞？咪笑，第一次聽David Bowie 都係CR2節目介紹，仲以為大衛寶兒係林保怡個friend，以為佢最勁嘅歌係Let’s Dance 同China Girl。對一個自命樂迷而言，咁講當然要比人笑死，但作為一個剛聽歌無耐嘅中學生而言，都差吾多啦。

咁又要講埋嗰陣嘅架勢，有幾場外國歌星演唱會，因為電台聽得多，聽聞佢哋要嚟香港，係覺得興奮嘅，覺得香港真係Part Of The Game。因為啲歌星一般都係去開亞洲開Show 至會路過順道嚟香港。咁又真係要多得當期時嘅搞手，好似《音樂一周》搵嚟Japan，仲有Culture Club，Bauhaus，Paul Young。83年ESPIRIT又贊助David Bowie 。
講起，呢次David Bowie嘅香港行都幾有時代意義，1983年12月8號，佢响新開嘅紅館做Serious Moonlight Tour，唱Imagine 向John Lennon致敬，佢哋曾經响1977年同遊過香港。
唔止咁，以為David Bowie係流行巨星嚟架咋，講乜嘢香港前途問題呢？但係請去Youtube 查番呢條記錄加劇情片David Bowie-Ricochet(1984)，佢竟然响珍寶海鮮坊旁嘅海上，大談呢個殖民地嘅前途去向。至於同場平行處理，講香港Band 友撲水去買飛睇佢個Show 嘅故仔，參演嘅仲係而家都相當有名氣嘅音樂人。你話係咪幾前衛下。

好喇，睇show光榮史係：由Japan，Culture Club，Bauhaus，Paul Young，David Bowie 去到85年嘅Wham，咁多外國巨星香港地現場演出，統統，文佬都.......唔响現場。
因為當時仲係窮學生哥，除咗唔夠錢去，當然亦因為仲未有夜晚出街去睇Show嘅自由。

當年係1982-1985年之間嘅香港，亦係呢個地方命運決定嘅幾年。好多年以後，我哋發現，英國人留比我哋嘅嘢，珍貴嘅都唔少，但响青少年時代，就係呢兩樣最重要：對英國足球同音樂嘅熱情。

3
就好似打開咗另一道門一樣。電台，成為幾重要嘅吸收源頭。其實真要講香港流行，好應該為商台另闢一章慢慢講，佢節目有風格有影响力之外，經過呢條冷河嘅人材亦輩出，好多嘢影响咗香港成長嘅，由六啤半十八樓C座到大班光明頂嘩嘩嘩真係電台創意同口水多過浪花。演藝創作電影填詞界到政界幕前幕後，由俞老琤、林夕、Wyman、軟硬、快慢必、阿齋到彭浩翔。其實係生產咗好多特有嘅港式嘢。

由中意聽，到唔知有冇機會一試下身手，成為Part Of The Game，相信係其時好多年青香港人嘅心願。覺得置身大時代，要响呢個廣義嘅流行產業中佔一席位，無論係開咪、寫詞、拍嘢、做音樂、拍廣告、寫下評論，總之覺得响咁勁嘅大環境下，點可以冇自己嘅聲音。

BTW，好多年之後，終於上到沒有殺人事件嘅廣播道開咪，但就發現入咗去嘅係去一台客串，仲係齋講冇得播歌嗰隻節目。正係：群英圍剿張無忌，有人去咗光明頂。

到咗1984年之後，雖然話對於文化大胃口而言，電台都開始有所不足啦。不過幾神嘅係，仲比文佬聽到，節目入面有啲新鮮嘢，有人播黑鳥，仲有另一隊樂隊，叫蟬。究竟係邊個咁前衛？唔記得。
不過《時空穿梭三小時》同後來嘅《嘉士伯星期日號外》主持就深印象，當邱世文講到一啲離開咗自己知識範圍嘅嘢時，就有種想知更多去追嘅欲望。於是翻下本雜誌，咁多「term屎」唔識嘅？影張相擺個pose又可咁嘅？
乜嚟㗎？

咁就同冇得去聽現場一樣，要Keep 住對音樂同新事物嘅愛好，要搵新嘅方式。
原來仲有個文字出版嘅世界！
從而又開展咗另一個範疇嘅音樂知識到其他文化嘅追求，通過睇雜誌同周報。當年大大話話有成十幾廿份用今日語言又係話百花齊放嘅周報。亦開始咗好多人嘅文字生涯。
1983年，中學要交嘅周記，文佬每星期仲係寫緊厭悶嘅中英會談結果「有益有建設性」。
而幾年之後，文佬都估唔到，會變成一個每星期都跑去周報office樓下信箱交稿（未用fax同電郵）嘅文字人。
响無數次編輯室吹水途中，終於有次出現一位當時已出咗幾張唱片都幾紅下，而家大家諗住想一齊玩下拍番部小電影嘅音樂人---- 後來，小電影冇拍出來，而呢位音樂人反而有咗音樂以外，响影壇嘅代表作：方丈。

文佬笑淚史之1

PS（格式學到足，下不為例）：
David Sylvian 同Japan 對同代人有多大影响？除咗大家認為《禁色》有Nightporter 影子外（「禁色」個名又要hyperlink去Forbidden Color即David Sylvian唱《戰場上的快樂聖誕》有歌詞版主題曲，凳登凳鄧登 ......,再同埋三島由己夫），另一首浮世繪嘅《月滿繁星夜》至係被遺忘嘅致敬作。雖然開場用咗快旋律，但琴音一起(David Sylvian又話係愛Satie嘅後果） ，加上梁翹柏那句尾音轉調，都8分David Sylvian上身。唔止咁，以劉以達同代創作人早期的Japan 影响（加埋David Bowie），該要追溯到一個更大嘅宏觀流行文化史，就係80年代初嘅China Chic。Japan响之前嘅81年就推出Tin Drum，當中大玩China Chic元素，而家回看，當然更似係外國人幾浮面嘅當時對cliché中國符號嘅賣弄，例如Visions Of China MV入面出現嘅紅衛兵，又或者Tin Drum 唱片封面嘅開飯場面。當然正值79年後，中國改革開放，中國重新返到世界視野，前衛嘅創作人最先東望想搵到中國靈感。不過嗰種風格說實在都幾cliché，又或者近似被日本消化過先吐番出嚟嘅「東方」。唔好忘記，David Sylvian 同Bowie （後來推出China Girl）都好熟嘅坂本龍一，YMO响嗰陣先至係「東方」代表。所以話，唔係單一嘅參考Japan，而係其時香港新一代音樂人（譬如劉以達响《香港》專輯入面也大玩呢種東方精神），剛好接上嗰個時代嘅聲音。

PPS
唔單止「上得山多遇發哥」，文佬係「交得稿多遇達Gor」。80年代，好多初出茅廬嘅寫字狂，好似林夕咁，都係一星期交多篇稿。同時期亦係周報嘅黃金歲月：數下《音樂一周》、《年青人周報》、《青年周報》、《100分》、《新時代》、《好時代》、 Music Bus，不計其數，大大滋潤咗其時嘅文化知識，仲有消費同打扮。知道要講乜吧，係嘅，London Calling，Greenpeace，Dr Martens 。同場地AC Hall、高山、明愛，仲有買碟聖地都會陸續出場。

延伸聽：

https://youtu.be/i6SlWg_pOew
Japan 嘅Nightporter live版本

https://youtu.be/Lg-MdpUg-us
月滿繁星夜

https://youtu.be/bkrVqjBJ_HQ
禁色

https://youtu.be/WhC8LnFd2LE
Visions of China

https://youtu.be/YwCakYbptcA
Ricochet

#老鬼出籠  #時代香港  #歌舞聲明
#香港身份流行育成  #劉以達

＝＝＝
消失的，在這裹重建。
更多香港流行記述back Up; 跨域文化趨勢connect，訂閱B鏡:
www.patreon.com/bonolee

更多 #香港身份流行育成：

起初，要有Sound：香港電子流行音樂往事（前達明時代）

1972年4月首播：香港粵語流行音樂開端此模樣

後梅迷：梅艷芳的滯後流行與粵語歌曾經的北征

李小龍的流行遺產